Olımpıada chempıony Áljan Jarmuhamedov Oral qalasynda boldy
Ataqty sportshy aldymen «Oral» oıyn-saýyq kesheniniń kınoteatrynda kórsetilgen «Dvıjenıe vverh» fılminiń kórsetilimine qatysty.
Oblys ákimi Altaı Kólginov ýaqytyn bólip, Aq Jaıyq óńirine arnaıy kelgeni úshin rızashylyǵyn bildirip, Á.Jarmuhamedovke alǵyshat tabys etti.
Reseılik rejısser Anton Megerdıchevtiń atalmysh fılmine 1972 jyly Mıýnhen Olımpıadasynda KSRO men AQSh basketbolshylary arasyndaǵy fınaldyq match arqaý bolǵan. Onda keńes sportshylarynyń match bitýge úsh sekýnd qalǵanda, jeńisti julyp, chempıon atanǵany belgili. Osy oıynnyń qaq ortasynda bolyp, qaharmandardyń birine aınalǵan Áljan Jarmuhamedovti Qazaq eli de qurmet tutady.
«Men ata-babalarymnyń jerine kelgenime qýanyshtymyn, osynda ákem týyp-ósti. Fılm premerasyna kelip, meni jyly qabyldaǵany úshin alǵysymdy bildiremin. Fılm de tek basketbol týraly ǵana emes, sonymen qatar dostyq, komandanyń birligi, olardyń jeńiske degen jigeri týraly. Jeńilmeıtindeı kóringen AQSh quramasyn tize búktirgen sol sportshylardyń erligi búginde ańyzǵa aınaldy. Sony rejısser men akterler jaqsy bere bilgen», dedi qazirgi kezde Máskeýde turatyn Áljan Jarmuhamedov.
Fılmnen keıin Oral qalasy men Zelenov aýdanynyń oqýshylary ataqty sportshydan qoltańba alyp, sýretke tústi. Sondaı-aq ataqty basketbolshy «Rýhanı jańǵyrý» mýzeıinde óńir jastarymen, sodan keıin sportshylarmen kezdesti.
