Olımpıada chempıony - Almaty qalasynyń qurmetti azamaty
ASTANA 25 qyrkúıek. QazAqparat - Jeksenbi kúni Almatynyń jaqsy oqıǵasynyń biri grek-rım kúresinen Olımpıada chempıony Jaqsylyq Úshkempirovtiń «Almaty qalasynyń qurmetti azamaty» atanýy boldy. Bul týraly «Egemen Qazaqstan» gazeti búgingi sanynda habarlady.
Sportsúıer qaýymnyń kóńilinen shyqqan ıgi is demalys kúni Almatydaǵy Ortalyq stadıonda ótken Qazaqstan Respýblıkasynyń fýtbol chempıonatynyń kezekti oıynynyń bastalýymen oraılastyrylǵan edi.
Almaty qalasynyń ákimi Ahmetjan Esimov osy oıyndy tamashalaýǵa shaqyrylǵan Olımpıada chempıonyn laıyqty ataǵymen ulyqtady.
- Almaty qashanda Qazaqstannyń sporttyq ordasy da bolyp tabylady. Bizdiń sportshylarymyz sońǵy Olımpıadada 200 memlekettiń ishinen 12-orynǵa taban tirep, tóbemizdi kókke jetkizdi. Bul, árıne, bizdiń maqtanyshymyz. Alaıda, keıde bizder qazaqstandyq sporttyń damýyna ólsheýsiz qajyr-qaırat jumsaǵan ardagerlerimizdi umytyp ketip jatamyz. Ótken aptada qalalyq máslıhattyń sheshimimen kezinde grek-rım kúresinen Olımpıada chempıony atanǵan Jaqsylyq Úshkempirovke «Almaty qalasynyń qurmetti azamaty» degen ataq berý uıǵaryldy, - dedi qala ákimi.
Qala basshysy maıtalman sportshynyń keýdesine «Qurmetti azamat» degen belgini taǵyp, kýáligin tabystady.
