Olımpıada chempıony A.Vınokýrov velosıpedin satqannan túsken qarjyny aýrý balalardyń emine jumsaıdy
«Bolashaq» qaýymdastyǵy baspasóz qyzmetiniń aqparatyna qaraǵanda, túsken qarajat tikeleı balalar emdeletin klınıkalardyń shottaryna aýdarylatyn bolady.
«Bul velosıpedtiń arqasynda men Olımpıada chempıony atandym. Endi onyń kómegimen densaýlyǵy nashar elimizdiń jas azamattaryna qoldaý kórsete alamyn. Balalar sportta bolmasa da, óz ómirinde chempıon bolatynyna kámil senemin. Ómirde ójet bolý qajet. Jeńiske jetýdiń joly osy!», - dedi Aleksandr Vınokýrov.
Kelip túsken qarajattyń arqasynda 4 jasar Aısha Beksultan (Almaty), 3 jasar Aıaýlym Qurbanova (Astana), 13 jasar Evgenııa Raspopova (Soltústik Qazaqstan oblysy), 14 jasar Nurbol Erejepov (Shymkent), 14 jasar Indıra Amanjolova (Kókshetaý), 15 jasar Evgenııa Boıkova (Qostanaı oblysy), 2 jasar Mılena Mezentseva (Almaty oblysy) shetelde emdeletin bolady. Ota quny - 6,5 myń AQSh dollarynan 55 myń AQSh dollaryna deıin. Otalardyń ortasha quny 28 myń AQSh dollary.
Aktsııany QR velosport federatsııasy men «Qaıyrymdylyq» qoǵamynyń qoldaýymen «Bolashaq» korporatıvtik qory ótkizdi.
Esterińizge sala keteıik, Olımpıada chempıony Aleksandr Vınokýrovtyń 39 jasqa tolýyna arnalǵan aýktsıonda sportshynyń velosıpedi 243 myń dollarǵa satyldy. Osy «Specialized» velosıpedimen 2012 jyldyń 28 shildesi kúni «Astana» komandasynyń kóshbasshysy London qalasynda ótken toptyq jarysta jeńiske jetken bolatyn. Vınokýrovtyń Londonda kıgen sporttyq formasy 10 myń dollarǵa satylsa, «Astana» komandasynyń formasy 2 500 AQSh dollaryna baǵalandy.
