Olımpıada chempıony Olga Rypakova saılaýda daýys berdi
ÓSKEMEN. KAZINFORM – Olımpıada chempıony, jeńil atletıkadan Qazaqstannyń belgili sportshysy Olga Rypakova Quryltaı depýtattaryn saılaýda óz tańdaýyn jasady.
Sportshy bul týraly áleýmettik jelidegi paraqshasynda jazdy.
Olımpıada chempıony daýysyn esepten shyǵarý kýáligi arqyly Astana qalasynda berdi. Bul qujat saılaýshyǵa eldiń kez kelgen óńirindegi saılaý ýchaskesinde daýys berýge múmkindik beredi.
- Elimiz úshin bul mańyzdy oqıǵa. Sebebi osyndaı saılaý birinshi ret bolyp jatyr. Quryltaı memleket damýyna jańa serpin beredi dep senemin, - deıdi Olga Rypakova.
Aıta keteıik, Olga Rypakova Óskemen qalasynda dúnıege kelgen. Ol Qazaqstannyń jeńil atletıka tarıhynda óz izin qaldyrǵan sportshy. Úsh qarǵyp sekirýden Olga Rypakova 2008 jylǵy Beıjiń Olımpıadasynda kúmis, 2012 jylǵy London Olımpıadasynda altyn, al 2016 jylǵy Rıo-de-Janeıro Olımpıadasynda qola medal jeńip aldy.
Sporttyq mansabyn aıaqtaǵannan keıin ol jeńil atletıkany damytýǵa atsalysyp keledi. Qazirgi ýaqytta Qazaqstannyń jeńil atletıka federatsııasynyń jattyqtyrýshy-keńesshisi retinde jas sportshylarǵa tájirıbesimen bólisip júr.
Óskemende Olımpıada chempıonynyń esimi berilgen jeńil atletıka ortalyǵy jumys isteıdi. Munda jasóspirimder sportpen shuǵyldanyp, kásibı sportqa alǵashqy qadamdaryn jasap keledi.
Eske salsaq, Almatyda Olımpıada chempıony Mıhaıl Shaıdorov óz tańdaýyn jasaǵanyn jazǵan bolatynbyz.
