Olımpıada chempıony Mıhaıl Shaıdorovty týǵan qalasy qalaı qarsy aldy
ALMATY. KAZINFORM — Almatyda Almaty Arena sport kesheninde XXV qysqy Olımpıada oıyndarynyń júldegeri men qatysýshylaryn qurmetteýge arnalǵan saltanatty kesh ótti.
Jankúıerler, sport ardagerleri, belgili bapkerler men qala turǵyndary Olımpıadada el namysyn qorǵaǵan sportshylardy erekshe yqylaspen qarsy aldy. Ásirese, mánerlep syrǵanaýdan tarıhı jetistikke qol jetkizip, Olımpıada chempıony atanǵan Mıhaıl Shaıdorov kópshiliktiń ystyq yqylasyna bólendi.
Mıhaıl Shaıdorovqa úsh bólmeli páterge sertıfıkat, jańa avtokóliktiń kilti jáne aqshalaı syıaqy berildi.
— Bul men úshin sońǵy meje emes, alda úlken josparlar bar. Meniń jetistigim jas sportshylarǵa shabyt berip, jańa bıikterdi baǵyndyrýǵa serpin bolady dep senemin, — dedi Mıhaıl Shaıdorov.
Sondaı-aq sportshynyń bapkeri Aıgúl Qýanyshevaǵa 5 mıllıon teńge kóleminde sertıfıkat, al ulttyq quramanyń bas bapkeri ári chempıonnyń jeke jattyqtyrýshysy Ásel Qasanovaǵa bir bólmeli páterge sertıfıkat pen aqshalaı syıaqy tabystaldy.
Olımpıadaǵa qatysqan ózge sportshylar men olardyń bapkerlerine de 2 mıllıonnan 5 mıllıon teńgege deıingi aqshalaı sertıfıkattar berildi.
Eske salaıyq, Italııanyń Mılan jáne Kortına-d’Ampetstso qalalarynda ótken XXV qysqy Olımpıada oıyndarynyń erler arasynda mánerlep syrǵanaýdan otandasymyz Mıhaıl Shaıdorov altyn júldeni jeńip aldy.
Sportshy 25 aqpanda Astanaǵa ushyp keldi.
Keıin Aqorda rezıdentsııasynda HHV Qysqy Olımpıada oıyndarynyń jeńimpazy Mıhaıl Shaıdorov pen onyń jattyqtyrýshylaryn marapattaý rásimi ótti. Prezıdent XXV Qysqy Olımpıada oıyndaryndaǵy jetistikteri úshin Mıhaıl Shaıdorovty ІІ dárejeli «Barys» ordenimen, bapkeri, jattyqtyrýshy-keńesshi Alekseı Ýrmanovty ІІ dárejeli «Dostyq» ordenimen marapattady.
Al búgin, 28 aqpanda túnde ol týǵan qalasy — Almatyǵa oraldy.
Qala turǵynlary ony zor qoshemetpen qarsy aldy. Olardyń arasynda qala ákimdiginiń ókilderi, sondaı-aq sportshynyń otbasy men dostary boldy.