Olımpıada chempıony Mıhaıl Shaıdorovty daıarlaýǵa bólingen qarjy kólemi jarııalandy
ASTANA. KAZINFORM – Qazaqstanda qysqy olımpıadalyq sport túrleri boıynsha sportshylardy daıarlaý júıesi keshendi ári kópdeńgeıli memlekettik qoldaý tetigi retinde qalyptasqan.
- Olımpıadaǵa daıyndyq kezeńinde birneshe memlekettik organdy qamtıtyn keshendi jumys jospary ázirlengen. Qarjylandyrý oqý-jattyǵý jıyndaryn el ishinde jáne shetelde ótkizýge, halyqaralyq jarystarǵa qatysýǵa, sportshylar men jattyqtyrýshylardyń eńbekaqysyn tóleýge, medıtsınalyq jáne ǵylymı súıemeldeýge, sporttyq kıim-keshekpen qamtamasyz etýge, jarys baǵdarlamalaryn ázirleýge, psıhologııalyq daıyndyq pen jattyǵý úderisin uıymdastyrýǵa baǵyttalady. Bul sharalar otandyq sportshylardyń álemdik deńgeıdegi iri jarystarǵa tolyqqandy qatysyp, joǵary nátıje kórsetýine múmkindik beredi, - dep jazdy Týrızm jəne sport mınıstrliginen.
Qazirgi tańda elimizde qysqy olımpıadalyq sporttyń 13 túri damytylýda. Mılan jáne Kortına qalalarynda ótken 2026 jylǵy qysqy Olımpııa oıyndarynda Qazaqstan quramasy 10 dıstsıplına boıynsha óner kórsetti. Olımpıadalyq tsıkl barysynda ulttyq quramalar 612 oqý-jattyǵý jıynyn ótkizip, 434 halyqaralyq jarysqa qatysty. Daıyndyq sapasyn arttyrý úshin álemdik deńgeıdegi 13 sheteldik maman tartylyp, zamanaýı ádistemeler engizildi.
- Memlekettik qoldaýdyń naqty mysaly retinde otandyq mánerlep syrǵanaýshy, Olımpıada chempıony Mıhaıl Shaıdorov daıarlyǵy atalady. Olımpıadalyq tsıkl aıasynda joǵary dárejeli sportshyny qoldaýdyń barlyq tetigi tolyq kólemde iske asyrylǵan.
2025 jyly sportshy men onyń komandasynyń daıyndyǵyn qamtamasyz etýge baǵyttalǵan jalpy qarjy kólemi 263 394 581 teńgeni qurady. Onyń ishinde 19 oqý-jattyǵý jıynyna, sonyń ishinde 8-i Qazaqstanda jáne 11-i shetelde ótken jıyndarǵa 47 mln teńge, al 5 halyqaralyq jarysqa qatysýǵa 16 mln teńge bólindi, - delingen aqparatta.
Resmı derekke qaraǵanda, 2025 jyly sportshynyń jalpy eńbekaqysy QR Týrızm jáne sport mınıstrligi Dene shynyqtyrý jáne sport komıteti, federatsııa jáne ákimdik jelisi boıynsha 33 989 000 teńgeni qurady.
Jeke bapkeri Alekseı Ýrmanov 2025 jyly 26 mln teńgeden astam eńbekaqy alǵan. Horeograf I.V. Regınanyń eńbekaqysy 23 mln teńgeni qurady.
Sonymen qatar jarys baǵdarlamalaryn qoıý, eki kostıým tiktirý jáne mýzykalyq shyǵarmalarǵa avtorlyq quqyqtardy satyp alý shyǵyndary qarjylandyryldy. Buǵan deıin sportshy álem chempıonaty men Azııa oıyndaryndaǵy joǵary nátıjeleri úshin 6 694 581 teńge kóleminde birjolǵy syıaqy alsa, jattyqtyrýshylar shtabyna qosymsha 1 506 040 teńge tólengen.
Osylaısha, kóshbasshy sportshylardy daıarlaý modeli oqý-jattyǵý protsesinen bastap ǵylymı-medıtsınalyq qamtamasyz etý men materıaldyq qoldaýǵa deıingi keshendi qaǵıdatqa negizdelgen. Ataýly qarjylandyrý tájirıbesi júıeli memlekettik tásil retinde qalyptasyp, qazaqstandyq sportshylardyń qysqy sport túrlerinde álemdik deńgeıde básekege qabiletti bolýyna jaǵdaı jasap otyr.
Aıta keteıik, Mıhaıl Shaıdorov pen Gennadıı Golovkın Sofıa Samodelkınaǵa qoldaý kórsetti.