Olımpıada chempıony Eldos Smetov óz tańdaýyn jasady
TARAZ – KAZINFORM. Parıj Olımpıadasynyń jeńimpazy Eldos Smetov Taraz qalasyndaǵy N82 saılaý ýchaskesinde daýys berdi.
Óz tańdaýyn jasaǵan sportshy Eldos Smetov naýqan týraly pikirimen bólisti.
– Barlyǵy Qazaqstannyń bolashaǵy úshin daýys berýde. Osy oraıda otandastarymdy referendýmnan tys qalmaýǵa shaqyramyn. Men de qarapaıym qazaqtyń birimin. Sondyqtan óz tańdaýymdy jasadym. Ár qazaqtyń balasy eldiń bolashaǵyna beı-jaı qaramaı, tańdaýyn jasaýy kerek dep oılaımyn, - dedi tanymal dzıýdoshy.
Aıta keteıik, Jambyl oblysynda referendýmǵa qatysýǵa tıis jalpy saılaýshy sany – 716 680.
Oblystyq referendým komıssııasynyń málimetine sáıkes, óńirde 508 saılaý ýchaskesi jumys istep tur. Sondaı-aq referendýmǵa akkredıttelgen respýblıkalyq 13 qoǵamdyq birlestik jáne jergilikti 4 qoǵamdyq birlestikten baıqaýshylar qatysýda.
Budan bólek, tirkeýde joq azamattardy referendým ýchaskeleriniń mekenjaılaryna tirkeý servısi Taraz qalasynyń – 5 ýchaskesinde (№9, 28, 82, 496, 505) jumys istep jatyr. Atalǵan ýchaskeler joǵary jyldamdyqty ınternetpen qamtylǵan.
Eske salsaq, buǵan deıin Eldos Smetovtiń Olımpıadadaǵy jeńisinen keıin álemdik reıtıngide joǵarylaǵanyn jazǵan edik.
