Olımpıada chempıony Dıera Keldıerova eki jyldyq úzilisten keıin Qazaqstanda jarysqa shyǵady
ASTANA. KAZINFORM — Parıj Olımpıadasynyń chempıony, ózbekstandyq dzıýdoshy Dıera Keldıerova uzaq úzilisten keıin jarysqa qaıta qatysady. Bul týraly Іnformsports.kz jazdy.
17-18 qazan kúnderi Aqtaý qalasyndaǵy «Halyq Arenada» Turar Joldybaevty eske alýǵa arnalǵan dzıýdodan Azııanyń ashyq kýbogy (Aktau Asian Open 2026) ótedi.
Qazaqstan dzıýdo federatsııasynyń málimetinshe, baıraqty básekege Parıj Olımpıadasynyń chempıony Dıera Keldıerova da qatysady. Ózbekstandyq sportshy 52 kelige deıingi salmaq dárejesinde beldesedi.
Bul Keldıerova úshin 2024 jylǵy Olımpıada oıyndarynan keıingi alǵashqy resmı jarys bolmaq. Olımpıadadaǵy tarıhı jeńisinen soń ol ana atanyp, sporttyq mansabynda úzilis jasaǵan edi.
Aıta keteıik, Dıera Keldıerova 2024 jyly Parıjde ótken Olımpıada oıyndarynda altyn medal jeńip aldy. Sondaı-aq ol álem chempıonattarynyń eki dúrkin kúmis júldegeri jáne Azııanyń eki dúrkin chempıony.
Aqtaýdaǵy halyqaralyq dodaǵa Qazaqstan, Ózbekstan, Ázerbaıjan, Belarýs, Qyrǵyzstan, Chernogorııa jáne Reseıden shamamen 230 sportshy qatysady dep kútilýde.
Týrnırde júldelermen qatar halyqaralyq reıtıngtik upaılar da sarapqa salynady. Atap aıtqanda, altyn medal ıegerine 100, kúmis júldegerge 70, al qola júldegerge 50 upaı beriledi.
Dıera Keldıerova 17 qazanda tatamıge shyǵady. Olımpıada chempıonynyń uzaq úzilisten keıingi alǵashqy beldesýleri Aqtaýdaǵy jarystyń basty oqıǵalarynyń biri bolmaq.
Al Qazaqstannyń jas dzıýdoshylary Dýshanbede tatamıge shyǵady.
