Olımpıada chempıony Danııar Eleýsinov taǵy da qamaýǵa alyndy
ASTANA. KAZINFORM — Bokstan Olımpıada chempıony Danııar Eleýsinov Almaty áýejaıynda ushaqtan óz betinshe shyǵyp, perronǵa júgirgeni úshin 10 táýlikke ákimshilik qamaqqa alyndy. Bul týraly Kóliktegi polıtsııa departamentiniń baspasóz qyzmeti málimdedi.
Oqıǵa 25 qyrkúıekte Almaty — Astana baǵytyndaǵy reıske jolaýshylardy otyrǵyzyp jatqan kezde bolǵan. Er adam áýe kemesinen óz betinshe shyǵyp, perronǵa júgirip ketken. Osylaısha, ol avıatsııalyq qaýipsizdik talaptaryn buzǵan.
Osyǵan baılanysty jolaýshylardyń qaýipsizdigin qamtamasyz etý maqsatynda ushaqtaǵy barlyq jolaýshy syrtqa shyǵarylyp, tıisti rásimder júrgizildi. Sonyń saldarynan reıstiń ushýy keıinge shegerildi.
— Medıtsınalyq kýálandyrý nátıjesinde er adamnyń jeńil dárejede alkogoldik masań kúıde bolǵany anyqtaldy. Tekserý qorytyndysy boıynsha ol Ákimshilik quqyqbuzýshylyq týraly kodekstiń 5-baby boıynsha ákimshilik jaýapqa tartyldy, — dep habarlady Kóliktegi polıtsııa departamenti.
Atap aıtqanda, sportshy qoǵamdyq orynda masań kúıde bolǵany, tyıym salynǵan jerde temeki shekkeni, ushý qaýipsizdigi talaptaryn jáne áýe kemesiniń bortyndaǵy tártip erejelerin buzǵany úshin jáne usaq buzaqylyq jasaǵany úshin jaýapqa tartyldy.
Sot sheshimimen Danııar Eleýsinov 10 táýlikke ákimshilik qamaqqa alyndy.
Departament adamnyń mártebesi, tanymaldyǵy nemese burynǵy eńbegi ony jaýapkershilikten bosatpaıtynyn atap ótti. Zań talaptary bárine ortaq.
Buǵan deıin Danııar Eleýsinov ózine qatysty synǵa jaýap berip, Olımpıadadan keıin ishimdikke táýeldi bola bastaǵanyn ashyq aıtqan edi.
Onyń aldynda sportshynyń 20 táýlikke qamalyp, 7 jyl kólik júrgizý quqyǵynan aıyrylǵanyn jazǵan edik.
