Olımpıada chempıony ataǵynan aıyrylǵan el sportshylary kimder

PARIJ. KAZINFORM – Osyǵan deıingi Olımpıada oıyndarynda jeńis tuǵyrynyń eń bıik satysyna kóterilip, keıin sol ataǵynan aıyrylyp qalǵan sportshylarymyz da joq emes. Búgin Parıj Olımpıadasynyń alaýy tutanar aldynda sol atletterimiz týraly da aıta ketkendi jón sanap otyrmyz.

Naqtyraq aıtsaq, Qazaqstan táýelsiz el retinde jazǵy olımpıada oıyndaryna 1996 jyldan beri qatysyp keledi. Sodan beri Qazaqstanda jazǵy olımpıadanyń 20 altyn medalin jeńip alǵan bolatyn. Ókinishke qaraı, onyń altaýyn keıin sportshylarymyz keri qaıtaryp berdi. Oǵan basty sebep – dopıng daýy.

Endeshe, dopıngpen ustalyp chempıondyq ataqtarynan aıyrylǵan sportshylarymyzǵa keleıik.

Qazaqstandyqtarǵa eń aýyr tıgeni qyzylordalyq aýyr atlet Ilıa Ilınniń dopıng qoldandy dep aıyptalyp, Pekın jáne London olımpıadasynyń altynyn qaıtaryp berýi. Ilıa Ilın bir emes, eki birdeı Olımpıadada chempıony atanyp, eki birdeı ataǵynan aıyrylyp qaldy.

Odan keıin taǵy da aýyr atletıkadan Zúlfııa Chınshanlo, Maıa Maneza jáne Svetlana Podobedova Londonda alǵan altyndarynan aıyryldy. Sondaı-aq, taǵy bir aýyr atlet Nıjat Rahımov «dopıng erejesin buzdy» dep aıyptalyp, HOK Rıo olımpıadasynda alǵan altynyn qaıtaryp aldy.

Aıta keteıik, sońǵy tórt sportshy da Qazaqstanda týmaǵan. Zúlfııa Chınshanlo men Maıa Maneza Qytaıdan kelip Qazaqstan azamattyǵyn alsa, Svetlana Podobedova Reseıden, al Nıjat Rahımov Ázerbaıjannan kelgen bolatyn.