Olımpıada chempıony Aleksandr Vınokýrovtyń uly jol apatyna ushyrady

ASTANA. KAZINFORM — Grekııada aldaǵy jarystarǵa daıyndalyp jatqan Aleksandr Vınokýrovtyń uly jattyǵý kezinde jol-kólik oqıǵasyna tap boldy.

«XDS Astana Development Team» komandasynan málim etkenindeı, velosıpedshi burylystan kenetten shyǵa kelgen avtokólikpen soqtyǵysyp qalǵan.

Medıtsınalyq tekseris nátıjesinde onyń oń jaq jambasy synǵany anyqtaldy. Jaqyn arada Aleksandrǵa jambas súıegine ota jasalady, sodan keıin ol qalpyna kelý kezeńinen ótý úshin Frantsııaǵa jiberiledi.

— Qazirgi ýaqytta sportshynyń jaǵdaıy turaqty. Komanda oǵan qajetti barlyq qoldaýdy kórsetýde jáne tez saýyǵyp ketýin tileıdi, — dep habarlady XDS Astana komandasy.

Aleksandr Vınokýrovtyń 2012 jyly London Olımpıadasynda altyn alǵany málim. Onyń uly Aleksandr da áke jolyn qýǵan.

Eske sala keteıik, budan buryn Azııa chempıonatynda para velosportshylar altyn alǵanyn jazǵan bolatynbyz.