Olımpıada chempıondaryna qarsy aktsııa júrgizilip jatyr degenge qarsymyn - Erlan Turǵymbaev
NUR-SULTAN. QazAqparat - Búgin Úkimet otyrysynan keıin elimizdiń Іshki ister mınıstri Erlan Turǵymbaev Olımpıada chempıony Dmıtrıı Balandınniń kóliginiń aınasyn urlaý faktisine qatysty pikir bildirdi, dep habarlaıdy QazAqparat tilshisi.
«Qylmys álemniń kez kelgen elinde jasalady. Qylmys jasalmaıtyn birde-bir el joq. Dál sol jerde naqty Olımpıada chempıondaryna qarsy qandaı da bir aktsııa júrgizilip jatyr degenge túbegeıli qarsymyn. Bul eń aldymen sáıkestik. Ol qalanyń ortasy jáne kólik qoıýǵa arnalǵan oryn óte kóp. Beınebaqylaý júıesiniń jáne qyzmetkerlerimizdiń jedel jumysynyń arqasynda atalǵan qylmys bir táýliktiń ishinde ashylyp, qylmysker ustaldy. Menińshe, bul polıtsııanyń durys ári jaqsy jumysynyń nátıjesi», - dedi mınıstr.
Osy oraıda ol elimizdegi kólikterdiń qosalqy bólshekterin satatyn barlyq bazar tekserilip jatqanyn aıtty.
«Búgingi kúni kólik aınasyn satatyn búkil jerde reıdtik sharalar júrgizip jatyrmyz. Zańsyz jumys istep turǵan bazarlardyń barlyǵy is júzinde jabyldy. Qazirgi ýaqytta zaýyttan shyqqan bólshekter ǵana saýdalanyp jatyr», - dedi ol.
E.Turǵymbaev BAQ ókilderiniń Almatynyń jergilikti polıtsııa basshysy jazalana ma degen saýalyna da jaýap berdi.
«Ne úshin? Qylmysty bir táýliktiń ishinde ashqany úshin be? Aldyn alý sharalaryn taǵy da qarastyratyn bolamyz», - dedi E.Turǵymbaev.
Eske salaıyq, Almatyda Olımpıada chempıony Dmıtrıı Balandınniń kóliginiń aınasyn urlap ketken bolatyn. Kúdiktiniń urlyq jasaǵan sáti kóshedegi beınebaqylaý kamerasyna túsip qalǵan. Sonyń arqasynda ol bir táýliktiń ishinde ustaldy.
