Olımpıada Chempıondary qansha aqsha alady?

Bul týraly Azattyq saıty jazady.

Qazaqstan 27 shilde men 12 tamyz aralyǵynda Londonda ótetin olımpıadada altyn medal alǵan sportshyǵa 250 myń dollar, kúmiske - 150 myń dollar, qola medal alǵan sportshyǵa - 75 myń dollar syıaqy beriletinin málimdedi.

Gazeta.ru agenttiginiń habarlaýynsha, Reseıde altyn medal alǵan sportshynyń syıaqy kólemi Beıjiń olımpıadasymen salystyrǵanda 30 myń dollarǵa ósken (128 myń dollar nemese 100 myń eýro). Kúmis jáne qola júldege ıe bolǵandar tıisinshe 82 myń jáne 56 myń dollar (ıaǵnı 60 myń jáne 40 myń eýro) alady.

Belarýs úkimetiniń taǵaıyndaǵan syıaqysy da dál osy kólemde. Mojazarplata.com.ua ekonomıkalyq portalynyń málimetine qaraǵanda. Ýkraınada syıaqy mólsheri Beıjiń oıyndary kezindegimen birdeı: altynǵa - 85 myń dollar, kúmiske - 62 myń dollar, qolaǵa - 41 myń dollar. Al Tájikstan chempıondarǵa  62 myń dollar taǵaıyndap otyr. Kúmis (52 myń dollar) pen qola (42 myń dollar) alǵandar da qur alaqan qalmaıdy.

«Mır» telearnasynyń habarlaýynsha, Qyrǵyzstan úkimeti altyn alǵan sportshyǵa 150 myń dollar bermek.

Reuters aqparat agenttiginiń habarlaýynsha, Horvatııa eli altyn medal ákelgen ​​atletke 27 myń 500 eýro, kúmiske - 17 myń 500 eýro, qola alǵan sportshyǵa 12 myń eýro ustatady.

Bolgarııada syıaqy mólsheri Horvatııaǵa qaraǵanda kóp: altyn - 102 myń 500 eýro, kúmis - 82 myń 100 eýro, qola - 71 myń 800 eýroǵa «baǵalanǵan».

Lıtva jeńiske jetken sportshyǵa 116 myń eýro bermek. Ekinshi oryn alǵandar 72 myń 500 eýro, al qola júldeger atanǵandar 43 myń 500 eýro alady.

Chehııanyń syıaqy mólsheri Lıtvadan az. Cheh eli olımpıadadan altyn ákelgen atletke 75 myń eýro daıyndap otyr. Al kúmis pen qola júldeni ıelengenderdiń syıy eki ese az - 37 myń 500 jáne 22 myń 500 eýro.

Italııa altyn ákelgen sportshyǵa 140 myń eýro, kúmis júldegerge 75 myń eýro, qola alǵan adamǵa 40 myń eýro bermek.

Al The Telegraph basylymynyń habarlaýynsha, chempıonǵa Frantsııa - 41 myń 500, Qytaı - 35 myń,  Japonııa - 23 myń, Ońtústik Koreıa - 22 myń,  Avstralııa men Germanııa -  12 myń fýnt sterlıngke teń syıaqy taǵaıyndapty.

AQSh-ta olımpıada chempıondaryna beriler syıaqy kólemi 18 jyldan beri 25 myń dollar kúıinde ózgermeı keledi.

Shvetsııa men Norvegııada olımpıada júlde alǵan sportshylarǵa aqsha berilmeıdi. Esesine chempıondar qurmetine eldegi geografııalyq aımaqtardy ataıdy. Jeńimpazdarǵa demeýshiler syılyq berýi múmkin. Al Soltústik Koreıada jeńimpazdardy arnaıy memlekettik nagradamen marapattaıdy. Ulybrıtanııa da júldegerlerge syıaqy taǵaıyndamaıdy.

Derekkózi:Azattyq