Olımpıada chempıondary «Habar» arnasynda Astana týraly óz pikirlerimen bólisýde. VIDEO
ASTANA. 2 shilde. QazAqparat - «Habar» telearnasynda tanymal qazaqstandyq sportshylar, Olımpıada chempıondary Serik Sápıevtiń, Aleksandr Vınokýrovtyń jáne Baqtııar Artaevtyń qatysýymen túsirilgen beıne rolıkter kórsetile bastady.
Sportshylar elimizdiń bas qalasyndaǵy iri nysandar týraly óz áserlerimen bólisýde.
Qazaqstanda «Real» jáne «Barcelona» klýbtaryna uqsas «Astana» Prezıdenttik kásibı sport klýby qurylǵany belgili. Onyń maqsaty - álemdik arenada Qazaqstannyń bedelin nyǵaıtý.
Klýbtyń quramyna «Astana» basketbol komandasy, «Astana Dakar Tım» rallı-komandasy, «Astana» fýtbol komandasy, sý dobynan «Astana» komandasy, bylǵary qolǵap sheberlerdiń «Astana Arlans» komandasy, at sportynan «Astana» komandasy, «Astana» velokomandasy, «Barys» hokkeı klýby jáne «Qazaqstan Barysy» qazaq kúresin damytý jobasy endi.
Bas qalamyzdyń 15 jyldyq torqaly toıyna arnalǵan «Habar» Agenttiginiń beıne rolıkter jelisinde elimizdiń sańlaqtary óz pikirleri men oılaryn ortaǵa saldy.
Aleksandr Vınokýrov, velosporttan 2012 jylǵy Olımpıada chempıony: «Báıterek» burynnan-aq jaı ǵana nysan emes. Bul - bizdiń jas elordamyzdyń, táýelsiz Qazaqstannyń nyshany, úmitteri men talpynystary. 15 jyldan keıin onyń álemdik brendke aınalǵanyn qalaımyn.
Serik Sápıev, bokstan 2012 jylǵy Olımpıada chempıony: Ýaqyt - teńdessiz. Ásirese, sportshylar úshin. Sondyqtan demalys jáne oıyn-saýyq ta belgili bir paıdamen ótkizilýi tıis. Astanada jaqsy demalýǵa múmkindik beretin qyzyqty oryndardyń bolǵany qandaı jaqsy.
Baqtııar Artaev, bokstan 2004 jylǵy Olımpıada chempıony: Bizdiń elordamyz damyp jáne órkendep keledi, kún sanap kelbeti ózgerip, sporttyq rekordttar da jańartylýda. Oǵan jańa sporttyq nysandar men stadıondar sep bolyp otyr. «Astana Arena» ispetti qurylystar kóptep bolǵaı!
