Olımpıada astanasy ashyq daýys berý arqyly tańdalýy múmkin
ASTANA. QazAqparat - 2014 jyly Sochıde Halyqaralyq Olımpıada komıtetiniń aqpandaǵy sessııasynda osy komıtet múshesi bolyp saılanǵan Poýl-Erık Hoıer Olımpıada astanasy úshin daýys berý HOK-de ashyq túrde júrgizilýi kerek degen batyl usynysyn bildirdi.
Olımpıada chempıony Halyqaralyq Olımpıada komıtetiniń sheshimdi reformalar jasaýǵa kóndirmek nıette. Jýrnalıstermen oı bólisken Poýl-Erık Hoıerdiń aıtýynsha, Olımpıada astanasy úshin daýys berý Halyqaralyq Olımpıada komıtetinde ashyq túrde júrgizilýi kerek. Bul túrli ósek-aıańnan aýlaq bolýǵa kómektesedi jáne úmitkerler ózara kelisisip aldy degen kúdikten aryltady. Onyń ústine, óz qalalaryn alǵa tartý úshin qarajat salǵan uıymdastyrýshylar HOK-niń qanshama múshesi óz daýystaryn olardyń qalasyna beremiz dep ýáde etkenderimen, nelikten olardyń utylyp qalǵanyn túsinbeıdi. Álemdik badmıntondaǵy basty sportshynyń pikirinshe, ashyqtyq pen shynaıylyq ótinish berý úderisine qatysýǵa áldeqaıda kóp qalany tartady. Olardyń bári daýys berýdiń ádil ótkenine senimdi bolady. HOK-niń Monte-Karlodaǵy kezekten tys sessııasy 8-9 jeltoqsanda ótedi. Onda 40-qa jýyq mańyzdy sheshim qabyldanbaq. Solardyń arasynda eń tóńkerisshil sheshim - Olımpıada astanasyn tańdaýda ashyq daýys berý bolýy múmkin. Sebebi, uzaq jyldardyń ishinde alǵash ret 2022 jyly ótetin qysqy Olımpıada oıyndaryna úmitker retinde eki-aq qala - Almaty jáne Beıjiń qalalary qalyp otyr. Aıta keteıik, 1996 jyly ótken Olımpıada oıyndarynyń chempıony Hoıer sondaı-aq 2013 jyly badmıntonnan Halyqaralyq federatsııa prezıdentiniń oryntaǵyna saılanǵan.
