Olımpıada altynynan aıyrýǵa baılanysty Aýyr atletıka federatsııasy resmı málimdeme jasady

NUR-SULTAN. QazAqparat – 2022 jylǵy 22 naýryzda sport tórelik sotynyń (CAS) dopıngke qarsy departamenti 2021 jylǵy tamyzda ótken tyńdaý qorytyndysy boıynsha qazaqstandyq sportshy Nıjat Rahımovtyń dopıng máselesine qatysty isi týraly sheshim shyǵardy, dep habarlaıdy QazAqparat QR Aýyr atletıka federatsııasynyń baspasóz qyzmetine silteme jasap.

Osy sheshimmen aýyr atlet Nıjat Rahımov tyıym salynǵan ádisti qoldanǵany úshin kináli dep tanylyp, 2021 jylǵy 18 qańtardan bastap segiz jylǵa shettetildi, 2016 jylǵy 15 naýryzdan bastap sporttyq nátıjelerdiń kúshi joıyldy (alǵashqy «daýly» synamany alý kúninen bastap).

«Árıne, mundaı sheshim biz úshin kútpegen jaǵdaı boldy, óıtkeni tyńdaý barysynda N. Rahımovtyń advokattarynyń dálelderi senimdi boldy jáne tyńdaý sátinen bastap, bul alty aıdan astam ýaqyt, sportshynyń atyna da, federatsııaǵa da qosymsha suraýlar men túsiniktemeler túsken joq»,- dep málim etti QR AAF Bas hatshysy Aldııar Nuralınov.

Aıta ketý kerek, bul úkim birinshi ınstantsııanyń sheshimi bolyp tabylady, tyńdaý bir tóreshiniń qatysýymen CAS dopıngke qarsy departamenti deńgeıinde ótti.

QR AAF dopıngtiń kez kelgen kórinisine múldem tózbeýshilik qaǵıdatyn ustanady, alaıda bul jaǵdaıda halyqaralyq federatsııa men sol kezde dopıng baqylaýdy júzege asyrǵan organdarǵa da qatysty birqatar suraqtar bar.

Federatsııa CAS dopıngke qarsy departamentiniń sheshimin appelıatsııalaýǵa jáne bizdiń sportshymyzdy qoldaýǵa odan ári kómek kórsetýge daıyn.