Olımpıada aldyndaǵy Tokıoda COVID-19 juqtyrýdyń sońǵy aıdaǵy rekordtyq jaǵdaıy tirkeldi

TOKIO. Kıodo-QazAqparat – Sársenbi kúni Tokıonyń astanalyq úkimeti 714 jańa koronavırýs juqtyrý oqıǵasy týraly málimdedi. Bul kórsetkish indetke shaldyqqandardyń kúrt óskenin kórsetedi, dep habarlaıdy QazAqparat Kıodo agenttigine silteme jasap.

Tokıoda ınfektsııa juqtyrýdyń jeti kúngi ortaq táýliktik kórsetkishi 508,4 bolyp otyr. Bul úkimettiń shkalasy boıynsha tórtinshi – eń nashar deńgeı. Aýrýdyń qaıta órshýi premer-mınıstr Esıhıde Sýganyń Tokıoda Olımpıadaǵa bir aıdan az ýaqyt qalǵan kezde taǵy bir tótenshe jaǵdaı engizýi múmkin degen qorqynysh týdyrdy.

«Biz ahýaly muqııat baqylap otyramyz jáne ýaqytynda kerekti sharalardy qoldanamyz», - dedi Sýga sársenbi kúni COVID-19 boıynsha mınıstrlik otyrysynda.

Densaýlyq saqtaý mınıstrliginiń saraptamalyq toptarynyń bólek otyrysynda Ulttyq juqpaly aýrýlar ınstıtýtynyń baǵalaýynsha, alǵash ret Úndistanda anyqtalǵan koronavırýstyń Delta nusqasy maýsymnyń sońyndaǵy Tokıodaǵy jáne kórshi prefektýralardaǵy juqtyrý oqıǵalarynyń 30 paıyzynyń sebebi bolǵan.

Instıtýt bul kórsetkishtiń 23 shildede bolatyn Olımpıada oıyndarynyń ashylýynyń aldynda 50 paıyzǵa jetýi múmkin dep eskertti.

Densaýlyq saqtaý, eńbek jáne áleýmettik qamtamasyz etý mınıstri Norıhısa Tamýra astanylyq aýrýhanalardaǵy tósek oryn tapshylyǵyn qalaı sheshýge bolatynyn talqylaýǵa shaqyrdy.

Tokıoda maýsym aıynda koronavırýstyń 12 979 jańa oqıǵasy tirkeldi.

Aıta ketsek, Olımpıada oıyndary 2020 jyldyń 24 shildesi men 9 tamyzy aralyǵynda ótýi tıis edi. Alaıda pandemııa saldarynan ýaqyty bir jylǵa shegerilip, osy jyldyń 23 shildesi men 8 tamyzy aralyǵynda ótetin boldy.