Olımpıada-2028: balýandar úshin irikteýdiń jańa júıesi bekitildi
ASTANA. KAZINFORM – Birikken kúres álemi (UWW) Los-Andjeleste ótetin 2028 jylǵy Olımpıada oıyndarynyń irikteý kezeńinde qoldanylatyn reıtıngtik upaı esepteý júıesin bekitti, dep habarlaıdy Sports.kz.
Jańa ereje 2027 jylǵy 1 qańtardan bastap kúshine enedi. Basty ózgeris – sportshylarǵa tek jarystaǵy orny úshin emes, árbir jeńgen beldesýi úshin de reıtıngtik upaı beriledi. Bul rette Ranking Series sanatyndaǵy týrnırlerdiń mańyzy arta túsedi.
Álem chempıonattary men Olımpıada oıyndarynda jeńimpaz 40 myń upaı ıelenedi. Oǵan qosa, ár jeńgen beldesýi úshin 2 myń upaı qosylady. Al birde-bir beldesýde jeńiske jetpegen qatysýshyǵa 250 upaı beriledi.
Ranking Series týrnırlerinde birinshi oryn alǵan balýanǵa 20 myń upaı, ár jeńisi úshin 1000 upaı esepteledi. Qurlyqtyq chempıonattar men oıyndarda jeńimpaz 10 myń upaı ıelense, ár jeńgen beldesýi úshin 500 upaı alady.
Al salmaq dárejesinde segizden az sportshy qatysqan jaǵdaıda, júldeli oryn úshin beriletin turaqty upaı sany eki ese qysqarady. Jarystan shettetilgen, óz erkimen jarysty toqtatqan nemese irikteýden ótpegen balýandarǵa reıtıngtik upaı berilmeıdi.
Olımpıadalyq reıtıngti qalyptastyrý kezinde UWW sportshylardyń 7 jarystaǵy eń úzdik bes nátıjesin esepke alady.
2027 jyly bul tizimge Ranking Series sanatyndaǵy úsh týrnır, qurlyqtyq chempıonat jáne álem chempıonaty kiredi. Al 2028 jyly balýandar bir Ranking Series týrnıri men qurlyqtyq chempıonatta upaı jınaı alady.
Reıtıngtik irikteý qorytyndysy boıynsha Olımpıadanyń ár salmaq dárejesinde úzdik úsh sportshy 2028 jylǵy oıyndarǵa joldama alady. Osylaısha, árbir jeńgen beldesý Olımpıada lıtsenzııasyn sarapqa salýda mańyzdy ról atqarady.
Aıta keteıik, Qatar astanasy Doha qalasynda nysana kózdeý men stend atýdan ISSF álem chempıonaty bastaldy.
