Olımpıada-2026: Mıhaıl Shaıdorovtyń jeńiske jetýiniń syry nede
MILAN.KAZINFORM – Qazaqstandyq Mıhaıl Shaıdorovtyń Italııada ótip jatqan XXV qysqy Olımpıada oıyndaryndaǵy jeńisi sheteldik basylymdarda qyzý talqylanyp jatyr. Osy oraıda Kazinform tilshisi otandasymyzdyń jarys barysyndaǵy óner kórsetýin taldap shyqqan edi.
Mıhaıl Shaıdorov Olımpıada tarıhynda qaldy
Nemis basylymy DW Shaıdorovtyń jeńisin sensatsııa dep jarııalady.
Basylymnyń habarlaýynsha, Shaıdorov tarıhta úshtik aksel-tórttik týlýp kombınatsııasyn oryndaǵan alǵashqy mánerlep syrǵanaýshy.
Amerıkalyq Slate onlaın jýrnalynyń habarlanýynsha, Mıhaıl Shaıdorovtyń óneri mamandardy tań qaldyrdy. Sebebi onyń baǵdarlamasy tarıhta tórttik aksel jasaı alatyn jalǵyz sportshy Ilıa Malınındy (AQSh) jeńýi qıyn edi.
- Mánerlep syrǵanaý sarapshylary Shaıdorovtyń ýaqyty kele jatyr dep boljaǵan. Biraq Krıs Shleıher atap ótkendeı, bul ýaqyt 2026 jyly emes, 2030 jyly kelýi kerek edi,- dep atap ótti basylym.
Olympics.com saıtynyń tilshisi Lena Smırnovanyń jazýynsha, Mıhaıl Shaıdorov úshtik jáne tórttik sekirý kombınatsııasyn oryndaýdyń negizin qalaýshy.
2024 jyldyń qarasha aıynda Shaıdorov resmı jarysta úshtik Aksel-tórttik týlýp kombınatsııasyn oryndaǵan alǵashqy sportshy boldy. Onyń mańyzdylyǵy – mánerlep syrǵanaýshy kombınatsııada ekinshi sekirý retinde tórttik sekirýdi sátti oryndaǵan alǵashqy jaǵdaı.
Olımpıadada jeńiske jetýiniń syry nede?
Smırnovanyń aıtýynsha, kombınatsııalyq sekirý qazaqstandyq sportshynyń basty ereksheligi. Bul onyń jeńiske jetýiniń basty sebebi. Sebebi, ol tarıhtaǵy alǵashqy «úshtik akselden bir eıler jáne tórttik salhaý» sýperkombınatsııalyq sekiristi sátti aıaqtaǵan mánerlep syrǵanaýshy atandy. Bul tehnıkalyq element joǵary baǵalanyp, 21.39 upaı enshiledi.
Aıta kereligi, Mıhaıl Shaıdorov básekede tórttik týlýp-úshtik týlýp kombınatsııasyn sátti oryndap, 17.92 upaı alsa, úshtik lýtts-ekilik aksel- SEQ kombınatsıasyn da sátti oryndap shyqty.
Jalpy alǵanda 12 tehnıkalyq elementtiń ishinde bes ret tórttik sekirýdi sátti oryndady. Osylaısha, onyń tehnıkalyq baǵalaýy 114.68 upaıdy qurady.
Mıhaıl Shaıdorov jarystan keıin BAQ ókilderine bergen suhbatynda osy tehnıkalyq elementterdi jasaý úshin kóp daıyndalǵanyn aıtty.
- Jarystarda bes birdeı tórttik sekirýdi shamamen úsh ret oryndap kórýge tyrystym, biraq birde-bir ret sátti shyqpady. Al búgin bári sátti oryndaldy. Sáti túsip, qolymnan keldi,- dedi sportshy.
Sondaı-aq, qazaqstandyq sportshy baǵdarlama komponentterin oryndaýda 83.96 upaı enshiledi. Bunda tóreshiler negizinen kórkemdik erekshelikke basa mán beredi.
Osylaısha, Mıhaıl Shaıdorovtyń qysqa baǵdarlamadaǵy 92.94 upaıyn qosa eseptegende, jalpy nátıjesi 291.58 upaıǵa baǵalanyp, eń joǵary jeke kórsetkishin jańalady.
Osyǵan deıin habarlaǵanymyzdaı, Shaıdorovtyń jeńisi Qazaqstan quramasynyń 2026 jylǵy qysqy Olımpıadasyndaǵy alǵashqy júldesi. Sonymen qatar ulttyq qurama araǵa 32 jyl salyp óz tarıhynda qysqy sport túrlerinen ekinshi altyn medaldy qanjyǵalady.