Olımpıada-2026: Qazaqstan UOK áleýmettik jelidegi belsendilik boıynsha top jardy
ASTANA. KAZINFORM — Qazaqstan Ulttyq Olımpıadalyq komıtetiniń áleýmettik jelidegi paraqshalary Italııada ótken 2026 jylǵy qysqy Olımpıada kezinde UOK-ter men olımpıadalyq quramalar arasynda eń joǵary nátıjelerdiń birin kórsetti.
IRIS Sport uıymy ANOC Social Media Dashboard jobasy aıasynda júrgizgen zertteýge sáıkes, Qazaqstan UOK-niń Instagram jelisindegi jarııalanymdardyń ortasha belsendiligi boıynsha birinshi orynǵa shyqty. Ár jazbada orta eseppen 24 583 belsendilik tirkelgen. Bul reıtıngke engen Ulttyq Olımpıadalyq komıtetter arasyndaǵy eń úzdik kórsetkish.
Qazaqstan UOK áleýmettik jelilerdiń jalpy tıimdiligi boıynsha da joǵary nátıje kórsetti. Jarııalanymdarǵa aýdıtorııanyń qatysý deńgeıin kórsetetin Engagement Rate kórsetkishi 118,9 paıyzdy qurap, komıtet reıtıngke engen UOK-ter arasynda tórtinshi oryn aldy. Zertteýge engen barlyq platformany qosa eseptegende, bir jarııalanymda orta eseppen 1,26 myń belsendilik tirkelgen.
Olımpıada oıyndary kezinde Qazaqstanǵa qatysty esepke alynǵan áleýmettik jelilerdiń jalpy aýdıtorııasy 7,78 mln jazylýshyǵa jetip, 112 myń adamǵa (+4,05 paıyz) artty. Jarııalanymdar jalpy 9,25 mln belsendilik jınasa, beınematerıaldar 34,1 mln ret qaralǵan.
Bul nátıjege kóp materıal jarııalamaı-aq qol jetkizildi. Jarııalanǵan materıaldar sany boıynsha AQSh, Italııa, Japonııa, Ulybrıtanııa jáne Frantsııa quramalary kósh bastady. Osy turǵydan alǵanda, Qazaqstan UOK-niń nátıjesi eń aldymen jarııalanymdardyń tıimdiligin jáne olardyń aýdıtorııany belsendi áreketke yntalandyra alǵanyn kórsetedi.
IRIS Sport zertteýine sáıkes, Olımpıada-2026 kezinde kórermenniń sportshylar týraly materıaldarǵa kóbirek qyzyǵýshylyq tanytqany anyqtaldy. Aýdıtorııanyń belsendiligin arttyrǵan jarııalanymdardyń qatarynda sportshylardyń emotsııasy, jeńisi men medaldary, jarysqa daıyndyǵy, jeke oqıǵalary jáne Olımpıada oıyndarynyń tasadaǵy sátteri týraly materıaldar basym boldy. Sporttyq nátıjelerge tikeleı qatysy joq kontent te joǵary qyzyǵýshylyqqa ıe bolǵan.
Qazaqstan UOK-niń jumysynda dál osy baǵyttarǵa basymdyq berildi. Ulttyq qurama músheleriniń ózderin, olardyń shynaıy emotsııalaryn kórsetýge mán berilip, sportshylardyń ózderi de kontent daıyndaýǵa belsendi qatysty. Birlesken jarııalanymdar da aýdıtorııany keńeıtip, jankúıerlerdiń qyzyǵýshylyǵyn arttyrdy. Mundaı format ásirese Instagram jelisinde joǵary nátıje kórsetti.
— Biz úshin áleýmettik jelidegi belsendilik boıynsha joǵary nátıje kórsetip, qatarynan ekinshi Olımpıada oıyndarynda da úzdikter qatarynda bolý óte mańyzdy. Parıjde ótken jazǵy Olımpıada oıyndarynda Qazaqstan UOK bul kórsetkish boıynsha ekinshi oryn alǵan edi. Al 2026 jylǵy Olımpıadanyń nátıjesi boıynsha birinshi orynǵa kóterildik. Bul atqarylyp jatqan jumystyń júıeli ekenin jáne eń bastysy, qazaqstandyqtardyń ulttyq quramaǵa degen qyzyǵýshylyǵy óte joǵary ekenin kórsetedi. Bizdiń jankúıerlerimiz óte belsendi. Olar sportshylarymyzdy baqylap, qoldaý bildiredi, pikir qaldyrady, jarııalanymdarmen bólisedi jáne quramamen birge olardyń eń jarqyn sátterin bastan ótkeredi. Qazaqstan UOK-niń halyqaralyq reıtıngte taǵy da kóshbasshylar qatarynan kórinýine jankúıerlerdiń osy belsendiligi kóp yqpal etti. Sportshylarymyzǵa qoldaý kórsetip, Olımpıada boıy olarmen birge bolǵan ár jankúıerge shyn júrekten alǵys aıtamyz, — dedi Qazaqstan UOK-niń marketıng departamentiniń dırektory Gúlnaz Shýkenova.
Aıta keteıik, tańdalǵan tásildiń tıimdiligi ANOC Digital Accelerator Programme aıasynda da jeke baǵalandy. Qazaqstan UOK 2026 jylǵy Olımpıada kezinde áleýmettik jelilermen jumys isteýdiń eń tıimdi tásilderine arnalǵan IRIS Sport keıs-stadıin daıyndaý úshin tańdalǵan eki Ulttyq Olımpıadalyq komıtettiń biri boldy.
Buǵan deıin habarlanǵandaı, Mıhaıl Shaıdorov Italııadaǵy Olımpıada oıyndarynyń chempıony atandy.
