Olımpıada-2026: hokkeı matchy norovırýs indetine baılanysty keıinge qaldyryldy

ASTANA. KAZINFORM — Qysqy Olımpıada aıasynda ótýi tıis áıelder arasyndaǵy Fınlıandııa men Kanada quramalarynyń hokkeı matchy norovırýs indetiniń anyqtalýyna baılanysty keıinge qaldyryldy, dep habarlaıdy Sky News.

Bastapqyda kezdesý beısenbi kúni ótýi tıis bolǵan, alaıda Fınlıandııa quramasynyń oıynshylary arasynda aýrý belgileri tirkelgennen keıin medıtsınalyq qyzmetter matchty ótkizýge ruqsat bermedi. Halyqaralyq Olımpıada komıtetiniń (HOK) habarlaýynsha, matchty keıinge qaldyrý týraly sheshim medıtsınalyq sarapshylarmen keńeskennen keıin qabyldanǵan.

HOK barlyq áreketter ujymdyq túrde jáne densaýlyq pen qaýipsizdikti saqtaý hattamalaryna qatań sáıkes júzege asyrylǵanyn atap ótti. Negizgi basymdyq sportshylardyń, jattyqtyrýshylar shtabynyń, resmı tulǵalardyń jáne týrnırge qatysýshylardyń barlyǵynyń densaýlyǵy men ál-aýqaty bolǵan.

Uıym ókilderi matchty keıinge shegerý «qajetti ári jaýapty qadam» bolǵanyn atap ótip, bul sheshim jarystyń ádildigin saqtaýǵa baǵyttalǵanyn rastady.

Kezdesý 12 aqpanǵa belgilendi. Match hokkeı jarystaryn ótkizý úshin arnaıy salynǵan ýaqytsha sporttyq nysan — «Ro» arenasynda ótedi.

Bul kezdesý Olımpıadadaǵy eń kóp kútiletin matchtardyń biri sanalady, óıtkeni eki qurama da altyn medalǵa basty úmitkerlerdiń qatarynda. Kanada quramasy — 2022 jyly Beıjińde ótken Olımpıada oıyndarynyń qazirgi chempıony, ol fınalda AQSh quramasyn jeńgen. Al Fınlıandııa quramasy sol Olımpıadada Kanadadan 1:11 esebimen jeńilgenimen, qola júldeni ıelengen.

Aıta ketý kerek, mundaı jaǵdaılar buǵan deıin de qysqy Olımpıada oıyndarynda bolǵan. Máselen, 2018 jyly Ońtústik Koreıada norovırýs indetiniń órshýine baılanysty qaýipsizdik qyzmetiniń 41 qyzmetkeri aýrýhanaǵa jatqyzylyp, taǵy shamamen 1200 adam oqshaýlanǵan. Qoǵamdyq tártip pen qaýipsizdikti qamtamasyz etý úshin sol kezde qosymsha 900-ge jýyq áskerı qyzmetker tartylǵan.

Eske sala keteıik, XXV qysqy Olımpıada oıyndary 2026 jylǵy 6–22 aqpan aralyǵynda Italııanyń Mılan jáne Kortına-d’Ampetstso qalalarynda ótedi. Olımpıada oıyndarynyń ashylý saltanaty 6 aqpanda ańyzǵa aınalǵan «San-Sıro» stadıonynda Italııa ýaqytymen saǵat 20:00-de (Astana ýaqytymen 00:00-de) ótedi.

Aıta keteıik, Italııada ótetin Olımpıadaǵa ketken shyǵyn 5 mıllıard dollardan asty.

Al Qysqy Olımpıada aldynda qytaılyq robot shamamen 100 shaqyrym jol júrdi.