Olımpıada -2026: 21 aqpanda qazaqstandyqtar qaı sport túrlerinde synǵa túsedi

ASTANA. KAZINFORM – 21 aqpanda qazaqstandyq sportshylar úsh sport túri boıynsha medal úshin baq synaıdy.

Saǵat 15:00-de (Qazaqstan ýaqytymen) erler arasynda 50 shaqyrymdyq jappaı sóre formatyndaǵy jarys ótedi. Bul saıysta Ámirǵalı Muratbekov, Vıtalıı Pýhkalo jáne Naıl Bashmakov óner kórsetedi.

Saǵat 19:50-de konkımen júgirý sportyndaǵy sońǵy olımpıadalyq jarys – áıelder arasyndaǵy jappaı sóre bastalady. Qazaqstan atynan Elızaveta Golýbeva qatysady.

Saǵat 14:45-te frıstaıl-akrobatıkadan komandalyq jarystar ótedi. Baǵdarlamada irikteý jáne fınal kezeńderi bar. Qazaqstan quramasy sapynda Aıana Joldas, Roman Ivanov jáne Asan Asylhan jarys jolyna shyǵady.

Al Qazaqstanda resmı túrde 22 aqpan bastalǵanda, tún ortasynan keıin mánerlep syrǵanaýdan gala-shoý kórsetilimderi ótedi. Bul jarys emes, kórermender úshin arnaıy baǵdarlama. Onda Mıhaıl Shaıdorov Olımpıadada kórsetilmegen jańa baǵdarlamasyn usynady.

Aıta keteıik, qysqy Olımpıada-2026 oıyndarynda Qazaqstan atynan 10 sport túri boıynsha 36 sportshy qatysyp jatyr. Atap aıtqanda, bıatlon, shańǵy jarysy, tramplınnen sekirý, shańǵy qossaıysy, frıstaıl-mogýl, frıstaıl-akrobatıka, taý shańǵysy, short-trek, konkımen júgirý jáne mánerlep syrǵanaý sporttary qamtylǵan.

Sondaı-aq Qazaqstan ókilderi frıstaıl-mogýl jáne mánerlep syrǵanaý boıynsha tóreshiler quramynda da jumys isteýde.

Aıta keteıik, buǵan deıin 20 aqpanda qazaqstandyqtar qalaı óner kórsetkenin habarladyq.