Olımpıada-2022 irikteý týrnırinde Qazaqstan quramasy matchyna bıletter qashannan bastap satylady
NUR-SULTAN. QazAqparat – Qazaqstan hokkeı federatsııasy «N» komandalar toby Olımpıada aldyndaǵy irikteý týrnıriniń 3-shi kezeńi matchyna bıletter josparlanǵan merzimnen kesh túsetinin habarlady. Bul týraly QazAqparat «SPORTINFORM» SAA-ǵa silteme jasap habarlaıdy.
Budan buryn bıletter satylymy OO-2022 irikteý týrnıriniń 2-shi kezeńinen keıin, atap aıtqanda 15 jeltoqsanda Barselonada ótken Ispanııa-Nıderlandy matchynan keıin bastalady dep boljanǵan edi. Alaıda, oıyn muzdyń sapasyna baılanysty aıaqtalmaı qaldy.
Halyqaralyq hokkeı federatsııasy (IIHF) bul matchty 2020 jyldyń 8 qańtarynda Barselonada qaıta ótetinin jarııalady.
Osylaısha, irikteý týrnıriniń 3-shi kezeńinde Qazaqstan ulttyq quramasynyń úshinshi qarsylasy kelesi jyldyń qańtarynda belgili bolady.
IIHF erejesine sáıkes, Nıderlandy quramasy jeńiske jetse, gollandııalyq hokkeıshiler Nur-Sultanǵa keledi. Eger Ispanııa komandasy jeńiske jetse, «Barys Arenada» «M» tobynyń 2-shi kezeńinde jeńgen Horvatııa quramasy oınaıdy. Al, Ispanııa Slovenııaǵa barady.
«N» tobynyń 3-kezeńiniń matchy Qazaqstan astanasynda «Barys Arenada» 2020 jyldyń 6-9 aqpan aralyǵynda ótedi. Qazaqstan quramasy úsh match ótkizedi: 6 aqpanda Ýkraınamen, 7 aqpanda Nıderlandy/Horvatııamen, 9 aqpanda – Polsha komandasymen oınaıdy.
