Olımpıada-2018: Jalǵyz qola janǵa medeý me, álde...

Jalǵyz qola janǵa medeý

Qazaqstan quramasy Phenchhandaǵy alǵashqy júldesine 11 aqpan kúni qol jetkizdi  - mogýlshy qyzymyz ıÝlııa Galysheva jeńip alǵan edi. Mine, sodan beri ár kún saıyn sportshylar jolyna úmitpen qarap, segiz kúndi de artqa tastadyq. Qazaqstan tilshileri tek «irikteý kezeńinen ótpeı qaldy, márege jete almady, utylyp qaldy, jarys jolynan shyǵyp qaldy» degen bir saryndy aqparat taratýdan da jalyǵa bastaǵan syńaıly.

Árıne, bul Olımpıada oıyndary. Ár sportshynyń armany da sol, tórtjyldyq dodada top jarý. Biraq, átteń árkimniń ómiri ózi oılaǵandaı bolatyn bolsa, ár kún saıyn otandastarymyz jeńis tuǵyrynan kóriner edi-aý...

Júldeli bolýǵa ne jetispeıdi?

Sońǵy kezderi Phenchhanda júrgen sportshylarymyz tilshilerdi kórgende syrt aınalyp ótýdi ádetke aınaldyra bastady. Biri suhbat berýden bas tartsa, ekinshisi júldesiz qalǵany úshin júzin jasyryp baǵýda. Árıne, ońaı emes, kim jeńilemin dep keldi deısiz. Barlyǵynyń armany qazaqtyń kók baıraǵyn jelbiretý ekenin biz de jaqsy bilemiz. Álbette, sportshylardyń bárine birdeı topyraq shashýdan aýlaqpyz. Keıbir sportshylarymyz arnaıy suhbat berip, kemshilikterdiń neden bolyp jatqanyn, ne jetispeıtinin ashyq aıtyp jatty. Solardyń biri - konkıshi Ekaterına Aıdova. Ol keshe 500 metr qashyqtyqta synǵa túsip, básekeni 21-shi orynmen aıaqtady. Jarystan keıin tilshilerge arnaıy suhbat bergen ol qysqy sport túrlerine úlken ózgerister kerek ekenin, bapkerler men jattyqtyrýshylar quramyn ózgertý qajettigin jaıyp saldy. Sondaı-aq, ózine Qazaqstanda básekeles bolatyn ózge sportshylardyń joqtyǵyn aıtyp nalydy. Onyń aıtýynsha, básekelestik bolmaǵan jaǵdaıda ilgeri jyljý bolmaıdy. «Sol úshin osy Olımpıadadan keıin úlken ózgerister jasalýy kerek», - dedi Ekaterına Aıdova.

Mine, osylaı biri sátsizdiktiń sebebine taldaý jasap jatsa, ózgeleri alǵan jaraqatyna oraı óz-ózin jubatýda. Aıtpaqshy, mánerlep syrǵanaýdan Qazaqstan juldyzy Denıs Ten osy maýsymda jaraqatynan tolyq aıyǵa almaǵandyqtan Olımpıadada qalaǵan nátıjesine qol jetkize almady.  

Úzilgen úmitter

Qysqy Olımpıada bizdiń el úshin sonshama nátıjeli bolǵan emes. Áıtse de qazaqstandyq jankúıerler birqatar sportshylardan úmit kútti. Aıtalyq, erler arasynda mogýlshylarymyz Pavel Kolmakov pen Dmıtrıı Reıherd júldege talasady dep oılaǵan edi. Ókinishke qaraı, olardyń  tek, úzdik ondyqqa engenine kóńil semirtip, máz boldyq. Pavelge sýperfınalǵa shyǵý úshin sál sáttilik jetpedi. Osy sport túrinen ulttyq quramadaǵy eń jas sportshymyz Aıaýlym Ámrenova irikteýde 17-oryn aldy. Osy qarqynda tursa Qazaqstanǵa keleshekte olja ákeletin da osy qarakózimiz dep túıdik. Bolashaǵynan úmit kútemiz dedik.

Janbota Aldabergenovanyń oryny bólek bolatyn. Biraq, ol úzdik 15 frıstaılshylardyń qatarynan ary asa almady. Erler arasyndaǵy saıysta Ildar Badrýtdınovtyń da úzdik on bes akrobatshylardyń qatarynan kóringenin kóńilimizge medeý tuttyq. Sonymen qatar, shańǵy jarysynan úmitti bolǵan Alekseı Poltoranınniń nátıjesi de kóńil kónshitken joq. Endi kimderge úmit artamyz? Endi bar úmitimiz áıelder ánerlep syrǵanaý saıysynan el namysyn qorǵaıtyn Elızabet Tursynbaeva men Olımpıada oıyndarynyń sońǵy kúnderi shańǵy saıysynan synǵa túsetin Alekseı Poltoranınniń jolyna taǵy da úmitpen qaraımyz.

Úzdik 25 eldiń ishinde júrgenimizdiń ózi jetistik

Keshe Olımpıada oıyndary qarsańynda Qazaqstan Respýblıkasy Ulttyq Olımpıada komıteti Sport dırektsııasynyń basshysy Elsııar Qanaǵatov myrzamen jolyǵyp qaldyq. Ol kisiniń esebinshe 1 qola medalmen úzdik 25 eldiń ishinde kele jatqanymyzdyń ózi úlken jetistik eken.

"Bul jazǵy oıyndar emes, qysqy olımpıada oıyndary. Sol úshin bir júldege iligýdiń ózi ońaı bolǵan joq. Sochıdegi jetistikti qaıtaladyq. Endi, bir medal bolyp qalýy múmkin", - dep qysqa qaıyrdy áńgimeni Qanaǵatov. Aıtpaqshy, munda BAQ ókilderine vıdeo men foto sýretter túsirýge tıym salynǵan.  Kóp jaǵdaıda Olımpıada oıyndarynda júrgen tilshilerge eldegi jankúıerleri ótip jatqan jarystan vıdeo, qyzyqty sýretter jiberýdi surap jatady. Alaıda, jazatyn tilshilerge vıdeo, foto túsirýge tıym salynǵan.  Olımpıadada tártip qatal. Tórtjyldyq dodaǵa akkredıtatsııamen tirkelip kelgen tilshiler negizinen úshke bólinedi. E - jazatyn jýrnalıst, EP-fotograf, Rtb-telekórsetilim quqyǵyn satyp alǵan televıdenıe tilshileri. Bul jerde vıdeo túsirýge tek Rtb quqyǵy bar bolsa, al foto EP akkredıtatsııasy bar jýrnalısterge arnalǵan. Ereje buzylǵan jaǵdaıda,  Olımpıada oıyndaryn uıymdastyrý komıteti akkredıtatsııanyń kúshin joıýǵa quqysy bar.

Esterińizge sala ketsek, qazirgi tańda Olımpıada oıyndarynyń jalpy esebinde 26 medalmen Norvegııa quramasy kósh bastap tur - 9 altyn, 9 kúmis jáne 8 qola. Ekinshi satyda Germanııa quramasy - 18 medal (9 altyn, 5 kúmis, 4 qola). Úzdik úshtikti Nıderlandy quramasy túıindeýde - 13 medal (6 altyn, 5 kúmis, 2 qola). Qazaqstan quramasy bir qola medalmen 92 eldiń ishinde 25-shi orynda jaıǵasyp tur.