Olımpıada-2018: Shorttrekshiler Gollandııa men Koreıada daıyndyqtan ótýde
Short-trekten Qazaqstan ulttyq quramasynyń bas bapkeri Mádiǵalı Qarsybekovtiń aıtýynsha, qazirgi kezde jigitter Gollandııada, qyzdar Ońtústik Koreıada daıyndalyp jatyr.
«Qyzdardyń daıyndyǵyn tekserýge Seýlge úsh kúnge kelgenmin. Munda koreıalyq maman ıÝn Seýng Nammen birge qazaqstandyq bapker Aslan Daýmov jumys jasaýda. Erteń Gollandııaǵa qaıtamyn. Basty maqsat - tórt jylda bir ret ótetin olımpıadada barynsha tabysty óner kórsetip, elimizdiń kók baıraǵyn bıikte jelbiretý. Bıylǵy jyldyń eń basty dodasynda Abzal Ájiǵalıev, Denıs Nıkısha jáne Nurbergen Jumaǵazıev 500 metr qashyqtyqta synǵa túsedi. Oǵan qosa Nurbergen 1 myń jáne 1500 metrden jarys jolyna shyǵady. Qyzdardan Anastasııa Krestova 500, 1000 jáne 1500 metrlik qashyqtyqta baǵyn synaıdy. Sondaı-aq Álııa atanǵan koreı qyzy Kım Iong A 1000 jáne 1500 metrden el namysyn qorǵamaq. Shorttrekshilerimiz óz tarıhynda alǵash ret on lıtsenzııaǵa qol jetkizgen bolatyn»-, dedi «QazAqparat» tilshisine M.Qarsybekov.
Short-trekten Qazaqstan quramasynyń kapıtany Nurbergen Jumaǵazıev te daıyndyqtarynyń oıdaǵydaı ekendigin, jaraqatynyń jazylǵanyn jetkizdi. «Qazir qolym da jaqsy, bizdi árdaıym qoldaıtyn elimizge, aǵaıyndardyń bárine Gollandııadan sálem aıtamyn. Jeńisti jyl bolýyn biz de tileımiz», dedi N.Jumaǵazıev.
Eske sala keteıik, Sochı olımpıadasynda negizin batysqazaqstandyq shorttrekshiler quraıtyn Qazaqstan erler quramasy 5 myń metrlik estafetalyq básekede besinshi orynǵa taban tiregen bolatyn.
