Olımpıada-2018: Phenchhanda Qazaqstannyń baspasóz ortalyǵy ashyldy
Búgin Phenchhanda ótetin HHIII qysqy Olımpıada QR Ulttyq Olımpıada komıtetiniń prezıdenti Tımýr Qulybaevtyń qatysýymen Phenchhandaǵy Olımpıada oıyndarynda qyzmet etetin qazaqstandyq tilshilerge arnaıy uıymdastyrylǵan baspasóz ortalyǵy resmı túrde ashyldy.
Munda jýrnalısterdiń kúndelikti jumys isteýine barlyq jaǵdaı jasalǵan. Jarystardyń translıatsııasy men Olımpıadaǵa qatysty barlyq málimetter baspasóz ortalyǵynda júrgiziledi. Sondaı-aq munda ár saıystan keıin qazaqstandyq sportshylarǵa arnalǵan baspasóz máslıhatyn ótkizý orny daıyndalǵan.
"Bizde jaqsy nátıjeler bar. Sportshylarymyz babynda, Olımpıada oıyndaryna daıyndalý úshin barlyq jaǵdaı jasaldy. Biraq, sportta jaqsy daıyndyqtan ózge sáttilik te kerek. Sol úshin bizdiń sportshylarǵa sáttilik tilegim keledi", - dedi Qazaqstan UOK prezıdenti Tımýr Qulybaev.
Al óz kezeginde Ulttyq Olımpıada komıtetiniń bas hatshysy Danııar Abýlǵazın qazaqstandyq BAQ ókilderine "Táýelsizdik Memleketter Dostastyǵy elderiniń ishinen biz sportshylar sany boıynsha ekinshi oryndamyz. Olımpıadanyń toǵyz sport túrinen joldama aldyq. Bizdiń delegatsııa maqtaýǵa turarlyq dep oılaımyn. Qansha medal alatynymyzdy boljaý qıyn, sebebi bul sport. Eń bastysy, úmit artatyn sportshylarymyz bar. Sportshylarymyzdyń Olımpıada oıyndaryna qatysyp jatqanynyń ózi qurmetke laıyq. Sportshylarymyzdyń jetistikterin bilýlerińiz qajet. Sol sebepti QR UOK men Sport jáne mádenıet mınıstrligi birlesip Rıo-de-Janeırodaǵy Olımpıadadaǵydaı jýrnalısterdiń jumysyn jeńildetý úshin baspasóz ortalyǵyn uıymdastyrdyq", - dep atap ótti.
Esterińizge sala keteıik, Olımpıada oıyndary erteń, ıaǵnı 9 aqpanda resmı bastalyp, 25 aqpanda aıaqtalady.
