Olımpıada-2018: Koreıadan qalap alǵan qyzymyz alǵashqy irikteýden ótpeı qaldy

PHENChHAN. QazAqparat - Búgin Ońtústik Koreıanyń Phenchhan qalasynda ótip jatqan HHIII qysqy Olımpıada oıyndarynda short-trekten 1500 metr qashyqtyqta synǵa túsken Kım Iong A alǵashqy irikteýden ótpeı qaldy, dep habarlaıdy QazAqparat tilshisi.

Koreıadan qalap alǵan qyzymyz jarysqa Vengrııadan kelgen Sara Lıýtsa Bakchaı, gollandııalyq sportshy Djorın Ter Mors, japondyq Sýmır Kıkýtı, ıtalııalyq sportshy Arıanna Fontana jáne ońtústikkoreıalyq sportshy Shım Sý Hımen synǵa tústi. Ókinishke qaraı, óz tobynda atalǵan qashyqtyqta máre syzyǵyn tórtinshi bolyp kesip, kelesi kezeńge ótpeı qaldy.

Sondaı-aq, týra osy qashyqtyqta synǵa túsken ekinshi short-trekshi arýymyz Anastasııa Krestova da úmitti aqtamady. Ol óz tobynda 1500 merdi 6-shy orynmen aıaqtady. 

Esterińizge sala keteıik, osyǵan deıin koreıalyq Kım Iong A Qazaqstan atynan Olımpıada oıyndaryna baratyny týraly habarlaǵan bolatynbyz.