Olımpıada-2018: Búgin qazaqstandyq 3 boksshy altyn úshin aıqasady
ASTANA. QazAqparat - Búgin qazaqstandyq úsh boksshy Býenos-Aıreste ótip jatqan Jasóspirimder olımpıadasynda fınaldyq jekpe-jekterin ótkizedi, dep habarlaıdy QazAqparat tilshisi.
Aqtyq synǵa Talǵat Shaıken (64 keli), Aıbek Oralbaı (91 keli) jáne Damır Toıbaı (+91) shyqqanyn habarlaǵan edik.
Boksshylarymyzdyń qarsylastary da belgili boldy. Talǵat Shaıken fınalda reseılik Ilıa Popovpen qolǵap túıistirse, Aıbek Oralbaı aljırlik Mohammed Hadıske qarsy shyǵady. Al asa aýyr salmaqtaǵy sportshymyz Damır Toıbaı ákki qarsylas, buǵan deıin de sharshy alańda kezdesken reseılik Alekseı Dronovpen judyryqtasady.
«Qýanýǵa áli de bolsa erte. Alda reseılik sportshy kútip tur. Onymen Álem chempıonatynyń fınalynda jolyqqanmyn. Qarymta qaıtarý úshin bar kúshimdi salamyn. Qarsylasymnyń Olımpıadaǵa jaqsy daıyndalǵany baıqalady. Degenmen, jeńis úshin aıanyp qalmaımyn», - dep keltiredi QR Ulttyq olımpıadalyq komıteti Damır Toıbaıdyń sózin.
Sondaı-aq búgin áıelder arasynda el namysyn qorǵap jatqan Nadejda Rıabets te sharshy alańǵa shyǵyp, aljırlik boksshymen qola medal úshin synǵa túsedi.
Jekpe-jek Astana ýaqytymen tamyzdyń 17-sinen 18-ine qaraǵan túngi, saǵat 00:00-de bastalady.
Aıta keteıik, Jasóspirimder olımpıadasynyń 17 qazan kúngi jarys kestesine saı búgin, sondaı-aq velosporttan (erler men áıelder, keshendi jarys, krıterıým) fınaldyq saıystar ótedi. El namysynE. Fedorov, G. Brýsenskıı, M. Kýrnosova, S. Paşenko qorǵaıdy. Bastalýy - Astana ýaqytymen saǵat 20.00-de.
Býenos-Aıres astanasy Argentınada ІІІ Jazǵy jasóspirimder olımpıadasy 6-18 qazan aralyǵynda ótedi. Oǵan 206 memleketten 4 myń sportshy qatysýda. Jarystar baǵdarlamasyna sporttyń dástúrli 28 túrinen bólek, sporttyq bıler (breık-dans), karate, taýǵa órmeleý, rolıkpen syrǵanaý qosylyp otyr.
Baıraqty dodada el namysyn 58 sportshy qorǵaýda.
Foto: www.olympic.kz
