Olımpıada-2018: Batysqazaqstandyqtar shorttrekshilerge sáttilik tiledi

ORAL. QazAqparat - Jabyq muz aıdyny saraıynda Olımpıadaǵa qatysatyn qazaqstandyq sportshylardy qoldaýǵa arnalǵan qysqy sport túrleri boıynsha festıval ótkizildi, dep habarlaıdy «QazAqparat» tilshisi.

Sharaǵa qatysýshylardy oblys ákiminiń orynbasary Ǵabıdolla Ospanqulov quttyqtap, barsha batysqazaqstandyqtardyń el namysyn qorǵaıtyn olımpıadashylarymyzdy qoldaıtynyn, olardyń jeńisine senetindikterin bildirdi.

Festıval barysynda hokkeıshiler men mánerlep syrǵanaýshylar jáne shorttrekshiler óz ónerlerin kórsetti. Sońynda barlyq sportshylar muz ústinde «Nurbergen men Abzal, Aqjaıyq sizderdi qoldaıdy!» degen jazýdy beıneledi.

Sharaǵa kelgender aldaǵy Olımpıada oıyndaryna qatysatyn Abzal Ájiǵalıev pen Nurbergen Jumaǵazıevtiń analary Sholpan Turarbekqyzy men Zınegúl Nuǵmanqyzymen tanysýǵa múmkindik aldy. 

Aıta keteıik, sporttyń short-trek túri Qazaqstanda budan otyz jyldan astam ýaqyt buryn Almaty, Qostanaı, Aqtóbe oblystarynda damı bastady. Oralda atalmysh muz aıdyny saraıy ashylǵannan keıin 2002 jyly qolǵa alyndy. Belgili bapker Mádiǵalı Qarsybekov kelip, short-trek bólimshesine daryndy jasóspirimder tartyldy. Qazirgi tańda munda Qazaqstannyń eńbek sińirgen jattyqtyrýshysy Maksım  Lozovoı bastaǵan mamandar M.Qarsybekovtiń isin jalǵastyrýda. 15 jyl ishinde batysqazaqstandyq shorttrekshiler óz tabystarymen kópke tanymal boldy. 2010 jylǵy Vankýver Olımpıadasyna Qazaqstannan jalǵyz Aıdar Bekjanov qana qatyssa, Sochıde negizin batysqazaqstandyqtar quraǵan erler quramasy 5 myń metrlik estafetada besinshi orynǵa taban tiredi. Sodan keıin A.Ájiǵalıev, N.Jumaǵazıev syndy sportshylarymyz álem kýbogy kezeńderinde top jardy. Bıylǵy Olımpıadada alǵash ret elimizden jeti birdeı shortrekshi joǵary oryndardan kóriný úshin baryn salatyn bolady. Oǵan qosa dúnıejúzilik dodanyń ashylý saltanatynda Abzal Ájiǵalıev Qazaqstannyń kók baıraǵyn alyp shyǵady.