Olımpıada-2018: Batysqazaqstandyqtar Alekseı Poltoranınge jeńis tileıdi
ORAL. QazAqparat - Olımpıadaǵa qatysyp jatqan qazaqstandyq sportshylardy qoldaý maqsatynda búgin Oralda shańǵymen júrý sharasy ótkizildi, dep habarlaıdy «QazAqparat» tilshisi.
«Atameken» lagerinde ótken dástúrli sharaǵa qatysqan oblys ákiminiń orynbasary Ǵabıdolla Ospanqulov óz lebizin bildirdi.
«Batys Qazaqstan oblysynyń sport súıer jurtshylyǵy atynan salaýatty ómir saltyn qoldaıtynymyzdy bildirip, jastardy sportpen aınalysýǵa shaqyramyz. Qazirgi kezde qazaqstandyq sportshylar Ońtústik Koreıada ótip jatqan Olımpıada oıyndaryna qatysýda. Erteń 50 kılometr qashyqtyqta Qazaqstannyń basty úmiti Alekseı Poltoranın jarys jolyna shyǵady. Biz oǵan jeńis tileımiz», dedi Ǵ.Ospanqulov.
Óńir basshysynyń orynbasary sondaı-aq Aqtóbe oblysynyń shańǵy estafetasyn qabyl alyp, ony soltústikqazaqstandyqtarǵa tapsyratynyn jetkizdi.
Sharaǵa qatysýshylar 3 shaqyrymdaı qashyqtyqty shańǵymen júrip ótti. Olardyń arasynda Rıo Olımpıadasynyń áıelder kúresinen qola júldegeri Ekaterına Larıonova bar.
Aıta keteıik, Oralda «Aqjayq SkiFest-2018» qysqy oıyndar festıvali ótýde.
Batys Qazaqstan. QazAqparat.
