Olımpıada-2012: S.Hasenova qarsylasyn 2 márte nokdaýnǵa jibergenimen, jarys jolynan shyǵyp qaldy
ASTANA. 5 tamyz. QazAqparat - Olımpıada tarıhyndaǵy alǵashqy áıelder boksynda 60 keli salmaq sanatynda Qazaq eliniń namysyn Saıda Hasenova qorǵady.
Ol búgin alǵashqy kezdesýin brazılııalyq Adrıana Araýdjoǵa qarsy ótkizdi. Alǵashqy raýndta bizdiń boksshy 1 upaımen alǵa shyqty. Ekinshi kezeńdi brazılııalyq teń aıaqtap, al úshinshi kezeńde tipti 2 upaıǵa alǵa shyǵyp ketti. Biraq bizdiń Saıda qarsylasyn eki márte nokdaýnǵa túsirgen edi. Osyny qaperge alǵan tóreshiler jeńisti kimge bererin biraz aqyldasa kele, qosymsha 4-shi raýnd belgiledi. Ókinishke oraı, bul kezeńde bizdiń sportshy brazılııalyqqa 1 upaı aıyrmashylyǵymen ese jiberdi.
7 jasynan bastap bokspen aınalysatyn S.Hasenova 1986 jyly tamyzda dúnıege kelgen. Qazirgi ýaqytta elimizdiń bokstan eńbek sińirgen jattyqtyrýshysy Kárim Mahmýdovtyń qol astynda jattyǵady. Ol Qazaqstan chempıonatynyń 6 dúrkin chempıony, 2010 jylǵy Azııa chempıony, 2003 jáne 2010 jyldary ótken Azııa oıyndarynyń júldegeri, 2011 jyly munaıly elder arasyndaǵy Álem kýbogynyń júldegeri.
