«Olımp» zerthanasy barlyq turǵyndarǵa tegin ekspress-testileý júrgizedi
NUR-SULTAN. QazAqparat – Sáýir aıynan bastap, «Olımp» klınıkalyq-dıagnostıkalyq zerthanasy koronavırýske ekspress testileý júrgizedi, dep habarlaıdy QazAqparat.
Jedel testileý – bul birneshe reagentter jaǵylǵan ishki test jolaǵy bar bir rettik plastıkalyq qurylǵy. Osy testtiń kómegimen saýsaqtan alynǵan kapıllıarlyq qandaǵy SARS-CoV-2 (COVID-19) koronavırýsyna IgG/IgM klasstarynyń antıdeneleri anyqtalady.
Alǵashynda IgM antıdeneleri ınfektsııadan 7-10 kún ótken soń shyǵa bastaıdy. Olar aýrýdyń dendeý kezeńin kórsetedi. Ári qaraı, ınfektsııadan 3-4 aptadan keıin IgG klasynyń antıdeneleri túzile bastaıdy, ınfektsııaǵa qalyptasqan ımmýndyq reaktsııany kórsetedi. Testileý kúrdeli jabdyqtardy qajet etpeıdi. Taldaý naýqastyń qatysýymen júrgiziledi. Nátıjeni 15 mınýt ishinde alýǵa bolady.
Atap ótken jón, jedel testtiń kómegimen koronavırýstyq ınfektsııa dıagnozy qoıylmaıdy, óıtkeni test aǵzadaǵy vırýsty anyqtamaıdy, tek oǵan ımmýndyq júıeniń reaktsııasyn baǵalaıdy.
Bul testti kimder tapsyrýy qajet? Eń aldymen, bul tekserýden koronavırýstyq ınfektsııa kúdigimen naýqastardy qabyldaǵan jedel járdem, emhana, aýrýhanalardyń qyzmetkerleri ótedi. Sondaı-aq, qaterli toptaǵy patsıentterge: júrek-qan tamyrlary, tynys alý júıesiniń sozylmaly aýrýlary bar adamdarǵa jáne qart adamdarǵa testileý júrgiziledi.
Testileýdi uıymdastyrý úshin arnaıy saýalnamasy bar saıt jasalady, onda patsıentter óz málimetterin engizedi. Sodan keıin Densaýlyq saqtaý mınıstrliginiń epıdemıologtary birinshi kezekte synaqtan ótýi qajet patsıentterdi tańdaıdy.
Sonymen birge, bul testileý 2019 jyldyń qarashasynan 2020 jyldyń naýryzyna deıingi aralyqta jedel respıratorlyq aýrýdyń (tumaý), pnevmonııanyń belgileri baıqalǵan adamdarǵa da qajet.
Test respıratorly ınfektsııanyń belgileri (dene qyzýy, jótel, entigý, tamaqtyń aýyrýy jáne t.b.) dendegen adamdarǵa qoldanylmaıdy, óıtkeni IgM antıdeneleri ınfektsııany juqtyrǵan sátten 7-10 kún ótken soń, al IgG – 3-4 aptadan keıin shyǵaryla bastaıdy jáne nátıjeniń teris bolyp kórinýi múmkin.
Ekspress-testileý nátıjesi oń bolyp shyqqanda, 2 nusqa qarastyrylady.
Eger IgM klasynyń oń antıdeneleri anyqtalsa (nemese antıdenelerdiń eki klasy da IgM jáne IgG oń bolsa), ınfektsııanyń shamamen 7-10 kún buryn paıda bolǵanyn bildiredi. Naýqas betperde kıip, úıge qaıtyp, oqshaýlanýy kerek jáne aýrýhanaǵa jatqyzý máselesin sheshý úshin jedel járdem shaqyrýy tıis.
Eger IgG klasynyń oń antıdeneleri anyqtalsa, bul patsıenttiń ımmýndyq reaktsııasynyń damýymen osy ınfektsııany bastan ótkergenin bildiredi. Qazirgi ýaqytta turaqty ımmýnıtettiń qalyptasýy jáne vırýstyń qansha ýaqyt boıy tasymaldanatyny týraly naqty málimet joq. Sondyqtan mundaı nátıjeni alǵan jaǵdaıda epıdemııaǵa qarsy sharalardy jalǵastyryp, Polımerazdy tizbektik reaktsııa ádisimen analız tapsyrǵan jón.
Test nátıjesi teris bolǵanda ne isteý kerek? Eki jaǵdaıda test nátıjesi teris bolýy múmkin: 1. Infektsııa joq; 2. Infektsııa jaqynda paıda boldy jáne antıdeneler áli paıda bolǵan joq. Mundaı vırýs tasymaldaýshysy basqalarǵa qaýipti bolýy múmkin, sondyqtan patsıent karantınde bolsa, oqshaýlanǵan kúıinde qalyp, barlyq aldyn-alý sharalaryn ustanýy kerek. Karantın aıaqtalǵan soń, ınfektsııany múldem boldyrmaý úshin qaıta tekserýden ótý kerek.
Nazar aýdaryńyz, ekspress testileýdiń naqtylyǵy 90%-dan aspaıdy, sondyqtan 10% jaǵdaıda barlyq nusqany eskergen jón. Dıagnozdy rastaýdyń negizgi ádisi –Polımerazdy tizbektik reaktsııa ádisimen analız tapsyrý.
