Olımp shyńyn baǵyndyramyn degen sportshy tártipke baǵyna bilýi kerek – Eldos Smetovtiń bapkeri
PARIJ. KAZINFORM — Frantsııa astanasy Parıj qalasynda Olımpıada oıyndary jalǵasyp jatyr. Biraq, Eldos Smetovtiń altyn medalinen keıin áli birde-bir sportshymyz altynǵa qol jetkize alǵan joq.
El qorjynyna alǵashqy altyn júldeni syılaǵan Eldos Smetovtiń jeke bapkeri Ǵalymjan Jylgeldıevpen suhbattasýdiń sáti túsken edi.
- Ǵalymjan myrza, sizdi tanystyrýdyń ózi artyq. Siz dzıýdo kúresinen qazaqtan shyqqan tuńǵysh Olımpıada jáne álem chempıony Eldos Smetovtiń bapkerisiz. Shákirtińizdiń jeńisin kórgende qandaı sezimde, qandaı kóńil kúıde boldyńyz?
- Bul sezimdi eshqashan tilmen aıtyp jetkize almaıtyn shyǵarmyn. Tipti, sýretpen de beıneleý múmkin emes. Qalaı aıtarymdy, qalaı jetkizerimdi de bilmeımin. Tek júregimmen ǵana únsiz sezinip júrmin.
- Eldostyń osyndaı chempıon bolatynyna 100 paıyz senimdi boldyńyz ba?
- Árıne, sendim. Ol naǵyz babynda boldy. Eń bastysy Eldos sol babyn saqtap, baryn salyp, chempıondyq ataqqa qol jetkizdi. Búkil eldiń senimin aqtady.
- Olımpıada oıyndaryna qalaı daıyndaldyńyzdar?
- Úlken jaqtan ulttyq qurama sapynda bolǵanymyzben ózimiz arnaı baǵdarlamamen jumys istedik. Bizge, memleket, úkimet bar jaǵdaıymyzdy jasap jatyr. Onyń ishinde Qazaqstan Ulttyq olımpıadalyq komıteti, Qazaqstan týrızm jáne sport mınıstrligi bar. Barlyq qujattarymyzdy bitirip berip, ir oqý-jattyǵýyna barýymyzǵa aqsha tólep, kıimderimizdi berip, shyǵaryp salyp, kútip alyp degendeı barlyq qyzmetti atqaryp jatyr. Ár mekemeniń ózine tıisti atqaratyn jumysy bar. Bastysy, shákirtimniń tarıhı jeńisine kýá bolyp qaıttym. Bul jeńis – burynǵy jeńisterden dámi múlde bólek qoı. Sondyqtan, atalǵan mekeme basshylaryna alǵys aıtamyn.
- Osyndaı Olımp shyńyn baǵyndyrýǵa qalaı birge jettińizder?
- Men Eldosty osyndaı bıikke shyǵarýǵa qanshama ter tókkenimdi ózim ǵana bilemin. Sondyqtan, meniń Olımpıada oıyndarynda qasynda bolýym, oǵan qoldaý bildirip, aqyl-keńesimdi aıtýym zańdylyq edi. Biz birge chempıon atandyq desem qatelespeımin. Biz jeńiske birge jettik, biz armandarymyzdy birge oryndadyq. Eldos ekeýmiz Olımpıadany birge sátti aıaqtadyq.
- Jalpy, Parıjge alpystan astam sportshynyń jeke bapkerleri kelipti. Osyndaı, Olımpıada oıyndarynda sportshylardyń jeke bapkerleri sportshylardyń qasynda bolýy olarǵa qanshalyqty kúsh beredi?
- Negizi, osyndaı tórt jylda bir-aq ret ótetin Olımpıada oıyndarynda ár ulttyq quramanyń bas bapkerimen birge jeke bapkerleri de birge kelýi óte durys sheshim dep qabyldaımyn. Jeke bapkerler Olımpıada barysynda óz shákirtteriniń ár qımylyn baǵyp, qadaǵalaýy kerek.
- Eldos qatarynan úsh Olımpıadada júlde aldy. Onyń osyndaı deńgeıin ustap turýynyń qandaı syry bar?
- Onyń eshqandaı syry joq. Eldos osyǵan deıin óziniń sportshy ekenin bir sátke umytqan emes. Ózin qatardaǵy jaýynger retinde ustap júrdi. Qaı kúni, qandaı buıryq bolsa, soǵan daıyn boldy. «Men Olımpıadanyń eki dúrkin jeńimpazymyn» dep bir kún masaıraǵan joq. Halyq qalaı erkeletti, solaı erkeledi. Erkeliktiń sheginen shyqqan emes.
- Bapker retinde Eldostyń qandaı qasıetterin erekshe atap óter edińiz?
- Eldos erekshe adam. Oǵan Alla sporttaǵy baq pen birge sanany da qosyp bere salǵan. Óte óz isine jaýapty. Aıtqandy eki etpeıtin elgezektigi, aqkóńildigi, meıirimdiligi, qoıshy áıteýir Eldostan bar jaqsy qasıetterdiń barlyǵyn tabasyń.
- Sportshy bıik beleske kóterilý úshin bapkerdiń naqty qandaı talaptaryn oryndaı bilýi kerek?
- Olımp shyńyn baǵyndyramyn degen sportshy tártipke baǵyna bilý kerek. Tártip bolmaǵan jerde bereke de bolmaıdy. Bereke bolmaǵan jer de eshqandaı eńbek jemisin bermeıdi. «Tártipke baǵynǵan qul bolmaıdy» demeı me?! Mine, Eldos osyndaı talaptardy oryndap, taýdaı bıikterge qol jetkizdi. Bizdiń keıbir sportshylarymyz bir belesti baǵyndyrsa boldy, ary qaraı ózinen «júldyz» jasap, qaıda úshyp ketkenin tappaı jatamyz...
- Endi Eldos sporttyq mánsabyn aıaqtaı ma? Eger aıaqtap jatsa nemen aınalysýy múmkin?
- Ol jaǵyn ázirge sheshken joqpyz. Birden sporttan alystap ketemiz dep oılamaımyn. Eldostyń art jaǵynda da qanshama jastar ósip keledi. Olardy da oılaýymyz kerek. Jol berýimiz kerek.
- Bolashaqta «mynaý Eldostyń sport mektebi» deıtindeı ortalyqty kórýimiz múmkin be?
- Ol da múmkin. Nege, ondaı ortalyqtar ashpasqa! Almatyda, Astanadan ıá bolmasa basqa óńirlerden, tipti elimizdiń barlyq aımaǵynan Eldostyń atynda bolashaq chempıondardy shyńdaıtyn arnaıy ortalyqtar bolý kerek dep esepteımin. Bul másele aldaǵy ýaqyttyń enshisinde...
- Siz tek bapker ǵana emes, dzıýdo salasynyń úzdik mamany ekenińizdi de jaqsy bilemiz. Qazirgi jas býyndar arasynan Eldostaı bolashaq chempıondardy baıqap júrsiz be? Naqtyraq aıtsaq, Eldostyń izin basatyn kimder bar?
- Eldostyń bul bıigi, Eldostyń shyńy, endi eshqashan alasarmaıdy. Jyldar ótken saıyn bıikteı beredi. Sondyqtan, Eldosqa elikteıtin, Eldostaı bolǵysy keletin jastar býyny jyldan jylǵa artpasa kemimeıdi dep oılaımyn. Eldostaı uldy týǵan qazaq analary áli talaı osyndaı batyrlardy týatynyna senemin.
- Jalpy, qazirgi elimizdegi dzıýdo sportynyń damýyna qandaı baǵa beresiz?
- Óte jaqsy deńgeıde damyp kele jatyr. Qazir memleket sport salasyna qatty qolaý kórsetip jatyr. Osy qoldaýdy sezinip, ary qaraı jumys isteýimiz kerek.
Áńgimeńizge raqmet!
