«Olımp», INVIVO sııaqty kompanııalardyń portaldary memlekettik aqparat júıesimen ıntegratsııalanady

ASTANA. KAZINFORM — Májiliste zańnamaǵa densaýlyq saqtaý máseleleri boıynsha ózgerister engizýge arnalǵan taǵy bir zańnyń jobasy tanystyryldy.

Qujatty tanystyrǵan Densaýlyq saqtaý mınıstriniń birinshi orynbasary Tımýr Sultanǵazıev zań jobasy eldegi medıtsınalyq aqparat júıeleriniń bárin bir arnaǵa toǵystyrýǵa jol ashatynyn aıtty.

— Qoldanystaǵy zań aıasynda jeke menshik medıtsınalyq uıymdardyń aqparat quraldary tolyǵymen memleketti aqparat júıesimen ıntegratsııalanady. Osy zań jobasynyń aıasynda túrli jeke menshik aqparat júıeleri, ásirese, zerthanalyq portaldar, radıologııalyq aqparat júıelerin memlekettik aqparat júıelerimen ıntegratsııalaý kózdelip otyr, — dedi Sultanǵazıev.

Aıtýynsha, bul norma kórsetilgen medıtsınalyq qyzmetterge shynaıy monıtorıng jasaýǵa kómektesedi.

— Ózderińiz bilesizder, bizde «Olımp», INVIVO sııaqty jeke menshik laboratorııalyq, dıagnostıkalyq uıymdar bar. Qazir olardyń jumysyn kóre almaımyz. Ózińiz aıtqandaı naýqasqa qajetti zertteýler is júzinde shynymen júrgizilgenine kóz jetkize almaımyz. Osy zań aıasynda jeke menshik medıtsınalyq aqparat júıelerin memlekettik júıelermen ıntegratsııalanýǵa mindetteımiz, — dedi Tımýr Sultanǵazınov.

Buǵan deıin 2026 jyly elektrondy densaýlyq pasporttary tolyqqandy qoldanysqa enetinin jazǵan edik.