Ólimdi «jeńgen» Djeıkobs Golovkın soqqylaryna shydap baqty

Sol mezette Djeıkobs kelip, Golovkındi qushaqtady. «Seni syılaımyn, komandańdy da» dep shynaıy qurmetin kórsetti. Ólimniń aýzynan qalǵan, ómirdiń qunyn, jeńistin baǵasyn jaqsy biletin Djeıkobs árıne, osylaı deýi kerek edi...

Óıtkeni, Djeıkobstiń ómirbaıanyn biletin adam bolsa, onyń qazaq jaman aýrý atap ketken, obyrdy jeńgenin aıtady. «Obyrdy jeńgenmin, Golovkındi de jeńe alamyn» degen bolatyn ol dodaǵa deıin. 

2011 jyldyń sáýirinde velosıped teýip júrgen ol esinen tanyp qulaıdy. Jaı ǵana talma shyǵar dep asa mán bermegen boksshy bul aýrdyń arty jaman ekenin ol kezde bilmegen. Osy talyp qulaǵannan keıin ol bir aptadan soń taıaqqa súıenip júrýge májbúr bolady.

Kásipqoı boksqa deıin ol 137 kezdesý ótkizip, 7-ýinde ǵana jeńilgen. Ol jasóspirimder arasyndaǵy olımpıada jeńimpazy, «AQSh-tyń» altyn qolǵabyn jeńip alady.

Al kásipqoı boksta ol 2007 jyly alǵashqy qarsylasyn 29 sekýndta, kelesisin 1 raýndtyń ishinde, úshinshisin 2-shi raýnda jeńip, aıdy aspanǵa bir-aq shyǵarady. Sodan keıingi 9 kezdesýde ol WBO, NABO jáne NABF nusqalary boıynsha chempıon atanady.

Alaıda, 2010 jyly WBO chempıondyǵyna talasta ol Dmıtrıı Pırogtan ońbaı jeńiledi. 5-shi raýnda Pırog Djeıkobsti sulatady. Bul jeńilisine ájesiniń bir apta buryn dúnıeden ótýi de sebep bolǵan desedi keıbireýler. Qaıǵyrǵan boksshy tolyq kúshin jumsaı almaǵanyn aıtqan.

Alaıda, kóp uzamaı ol 2010 jyldyń jeltoqsanynda 5 raýnda Djessı Ortany qulatsa, kelesi jyly naýryz aıynda birinshi raýnda Klııverdi tize búktiredi.

Jeńis satysymen kóterilip kele jatqan Djeıkobs týraly 2011 jyldyń sońynda sumdyq jańalyq shyǵady. BAQ onyń 7 aıdan beri aýrýhanada ómiri úshin kúresip jatqanyn jarysa jazady.

Alǵashqy talyp qulaǵanynda dárigerler júıke júıesi zaqymdanǵan dep dıagnoz qoıǵanymen, keıin oǵan arqasynda qaterli isik bar ekeni anyqtalady. Djeıkobs tap bolǵan «Osteosarkoma» dep atalatyn obyr adam omyrtqasyn qısaıtyp, júıkeni joıyp, sal aýryna shaldyqtyrady.

Dertten qutylý úshin ol mamyr aıynda ota jasatady. Ota sátti bolyp, barlyq isik alynady.

Djeıkobstiń aıtýynsha, ol narkozdan oıanǵannan keıin, qasyndaǵy kezekshi dárigerden jattyǵýǵa qashan bara alamyn dep surapty.

Oǵan dáriger: «Aýyr bolsa da aıtaıyn, sen endi «shaýyp kete» almaısyń, boksty umyt», deıdi.

Aldaıda, boksshy onyń bárin teriske shyǵaryp, otadan keıin birneshe aptadan soń sport alańdaryndaǵy týrnıkke tartylyp, belsendi ómirin bastap ketedi.

Sol jyldyń kúzinde alǵashqy sparrıngke shyǵady. 2012 jyly ábden babyna kelgen ol alǵashqy kezdesýin ótkizedi. Alǵashqy raýndta-aq, Djosh Lıýterandy qulatady.

Osy aýrýdan keıin, ol 9 kezdesý ótkizip, barlyǵyn nokaýtpen jeńip keldi. Búgingi 10-shy kezdesýinde temir Golovkınge shydap baqty.

Sol úshin Golovkın oǵan alǵysyn da aıtty.

«Dennı men onyń komandasy óte jaqsy jumys jasady. Óte jaqsy, óte taza jumys. Dennı, sol úshin meniń qurmetimdi qabyl al! Árıne, meniń komandama da, bapkerime de, sport jankúılerine de alǵys aıtamyn. Dennı jarady! Onyń daıyndyǵy jaqsy!", - dedi Gennadıı Golovkın.