Ólim jitim deńgeıin tómendetý maqsatynda 2013 jylǵy sharalarǵa 477,8 mlrd. teńge jumsalmaq
ASTANA. 24 qyrkúıek. QazAqparat - Búgin QR Parlamenti Májilisi Áleýmettik-damý komıtetiniń otyrysy bolyp ótti.
Onda Qazaqstan Respýblıkasynyń densaýlyq saqtaý salasyn 2013-2015 jyldarǵa arnalǵan bıýdjetten qarjylandyrý máselesi talqylandy.
Densaýlyq saqtaý vıtse-mınıstri Aıda Qurmanǵalıevanyń aıtýynsha, Qazaqstan Respýblıkasy Densaýlyq saqtaý mınıstrliginiń 2011-2015 jyldarǵa arnalǵan Strategııalyq josparynda 2 baǵyt, 3 maqsat, 6 mindet, 48 kórsetkish pen olarǵa qol jetkizýge arnalǵan 80 is-shara ótkizý kózdelgen. «Atap aıtqanda, «Azamattardyń densaýlyǵyn nyǵaıtý jáne ólim-jitim deńgeıin tómendetý» - atty birinshi baǵyttyń sheńberinde úsh jyldyq bıýdjetten 1 trln. 506,1 mlrd. teńge kózdelgen. Sonyń ishinde 2013 jyly - 477,8 mlrd. teńge, 2014 jyly - 509,8 mlrd. teńge jáne 2015 jyly - 518,5 mlrd. teńge somasynda shyǵystar boljanyp otyr», - deıdi vıtse-mınıstr.
Onyń aıtýynsha, atalǵan birinshi baǵytty iske asyrý 2015 jylǵa kútiletin ómir súrý uzaqtyǵyn 70,1 jasqa deıin, jalpy ólimdi 1000 adamǵa shaqqanda 7,62-ge deıin tómendetýge múmkindik bermek.
«Sonyń ishinde ana men bala óliminiń kórsetkishin 2010 jylmen salystyrǵanda tıisinshe 47 paıyzǵa jáne 29 paıyzǵa tómendetýge, qan aınalymy júıesiniń aýrýlarynan 30 paıyzǵa, onkologııalyq aýrýlardan bolatyn ólimdi 12 paıyzǵa jáne týberkýlezden bolatyn ólimdi 32 paıyzǵa tómendetýge múmkindik beredi», - deıdi vıtse-mınıstr.
