Ólim jazasynyń kúshin joıý: Kodekske túzetýler Parlament qaraýyna engiziledi
«Jyl basynda Qazaqstan ólim jazasynyń kúshin joıýǵa baǵyttalǵan halyqaralyq paktige Ekinshi fakýltatıvtik hattamany ratıfıkatsııalady. Ony júzege asyrý turǵysynda Qylmystyq kodekske tıisti túzetýlerdi pysyqtaý talap etildi. Osy oraıda bul baǵyttaǵy jumystar qaı kezeńde tur?», - dep surady senator Sergeı Ershov.
Óz kezeginde QR Bas prokýrorynyń birinshi orynbasary Berik Asylov bul rette zań jobasynyń kontseptsııasy ázirlengenin atap ótti.
«Kontseptsııa normatıvti-quqyqtyq aktilerdiń qoǵamdyq portaldarynda talqylandy. Aqpan aıynda vedomstvoaralyq komıssııa ótip, Úkimet ony maquldady. Qazirgi kezde Bas prokýratýra tarapynan zań jobasy daıarlandy jáne qujat saraptamadan ótip jatyr. ıAǵnı ekonomıkalyq, lıngvıstıkalyq, sybaılas jemqorlyqqa qarsy baǵyttar boıynsha taldaý jasalady. Tıisti qorytyndyny alǵannan soń, ony Úkimetke, sodan keıin sizderge tanystyramyz. Shamamen mamyr-maýsym aılarynda josparlap otyrmyz», - dedi Berik Asylov senatordyń suraǵanyna jaýap bere otyryp.
Eske salaıyq, 23 qyrkúıekte Birikken Ulttar Uıymynyń shtab-páterinde Qazaqstannyń BUU janyndaǵy Turaqty ókili Qaırat Omarov ólim jazasyn joıýǵa baǵyttalǵan Azamattyq jáne saıası quqyqtar týraly halyqaralyq paktiniń ekinshi Fakýltatıvtik hattamasyna qol qoıdy.
Keıinnen QR Syrtqy ister mınıstrliginiń baspasóz qyzmeti Qazaqstannyń atalmysh halyqaralyq paktige qosylýyna qatysty túsinikteme berdi.
Aıta keteıik, 2020 jyldyń jeltoqsan aıynda Parlament Senatynyń jalpy otyrysynda «Ólim jazasynyń kúshin joıýǵa baǵyttalǵan Azamattyq jáne saıası quqyqtar týraly halyqaralyq paktige ekinshi Fakýltatıvtik hattamany ratıfıkatsııalaý týraly» Zańy qabyldandy.
2003 jyly ólim jazasyn qoldanýǵa moratorıı engizilgennen keıin, bizdiń elde joǵary jaza sharasyn qoldanbaýdyń turaqty quqyqtyq rejımi qalyptasqan.
2021 jyldyń basynda Memleket basshysy «Ólim jazasynyń kúshin joıýǵa baǵyttalǵan Azamattyq jáne saıası quqyqtar týraly halyqaralyq paktige Ekinshi Fakýltatıvtik Hattamany ratıfıkatsııalaý týraly» Qazaqstan Respýblıkasynyń Zańyna qol qoıdy.
