Olıgopolııanyń 5,2 trln teńgesin ekonomıkaǵa tarttyq – Berik Asylov

ASTANA. KAZINFORM – Bas prokýror Berik Asylov zańsyz aktıvterdi qaıtarý jumystarynyń eki jyldyq nátıjesin atady.

- Sońǵy eki jylda zańsyz shyǵarylǵan aktıvterdi qaıtarý jumystarynyń nátıjesinde memleketke 1 trln 300 mlrd teńge kóleminde aqshalaı qarajat pen múlik qaıtaryldy. Osy qarajat esebinen elimizdiń barlyq óńirinde 434 áleýmettik nysan salyndy, - dedi ol prokýratýra organdarynyń bir jyldyq jumysyn qorytyndylaǵan jıynda.

Aıtýynsha, osy 434 nysannyń 150-den astam salynyp bitken.

- Onyń ishinde 99 medıtsınalyq mekeme, 48 sýmen jabdyqtaý obektisi, 2 sport nysany jáne 2 bilim berý obektisi qoldanysqa berildi. Olıgopolııa sýbektilerimen jalpy somasy 5,2 trln teńgeni quraıtyn ınvestıtsııalyq jáne áleýmettik jobalardy iske asyrý jóninde kelisimder jasaldy, - dedi Bas prokýror.

Buǵan deıin prokýratýra jeke sot oryndaýshylarynyń jasyrǵan tabysyn anyqtap, qosymsha salyq óndirgenin jazǵan edik.