Olıgarhtardan tárkilengen artefaktiler Ulttyq mýzeıge berilmek

ASTANA. KAZINFORM – Qaıtarylǵan aktıvterdi basqarý kompanııasynyń balansynda 10 artefakt bar. Aldaǵy ýaqytta olar elimizdiń Ulttyq mýzeıine berilýi múmkin.

— Búginde basqarýshy kompanııanyń balansynda tarıhı jáne mádenı qundylyǵy bolýy yqtımal artefaktiler (10 ataý) bar. Buıymdardyń naryqtyq baǵasyn anyqtaý múmkin emes, — dedi Qaıtarylǵan aktıvterdi basqarý kompanııasynan.

Qazirgi ýaqytta Mádenıet jáne aqparat mınıstrliginiń Mádenıet komıtetine qarasty «Qazaqstan Respýblıkasynyń Ulttyq mýzeıi» RMKK atalǵan buıymdarǵa qyzyǵýshylyq tanytyp otyr. Tipti, mýzeı qyzmetkerleri kompanııaǵa kelip, buıymdardy kórip, zerthanalyq saraptama jasaǵan. Osydan keıin basqarýshy kompanııaǵa atalǵan buıymdardy turaqty saqtaý, tereń ǵylymı zertteý júrgizý úshin mýzeı qoryna tapsyrý týraly ótinishpen júgingen.

— Osyǵan oraı basqarýshy kompanııa olardy munan ary Ulttyq mýzeıge tabystaý maqsatynda Qarjy mınıstrliginiń Memlekettik múlik jáne jekeshelendirý komıtetine berý máselesin qarastyrady, — dedi basqarýshy kompanııadan.

Eske salsaq, buǵan deıin Qarjy mınıstrligi Qazaqstandaǵy aktıvter memlekettik múlik tizilimi portaly arqyly satylatynyn, al shetelde ornalasqan aktıvterdi satý sol eldiń zańnamasyna sáıkes iske asyrylatynyn málim etken edi.