Olıgarhtar jylý elektr ortalyǵyn qaıtarý kezinde barlyq shyǵyndy óteýi tıis - Erlan Saırov

ASTANA. QazAqparat - Elimizdegi olıgarhtar jylý elektr ortalyǵyn qaıtarý kezinde barlyq shyǵyndy óteýi tıis. Bul týraly Májilis depýtaty Erlan Saırov aıtty, dep habarlaıdy QazAqparat tilshisi.

Búgin Parlament Májilisinde tilshiler depýtattan «Ekibastuzjylýenergo» JShS quryltaıshysy Aleksandr Klebanov jylý elektr ortalyǵyn memleketke qazirgi jaǵdaıynda bere salýy múmkindigi týraly surady.

«Qazaqstannyń ár azamaty osyndaı múlik úshin jaýapty boýly kerek. Eger Klebanov osy nysandardy memleketke qaıtaratyn bolsa, halyqqa jáne memleketke keltirilgen zalaldy óteýi kerek. Eki kún buryn ákimdikte jınalys boldy, oǵan Klebanov ta keldi. Sol kezde osy jaıynda oǵan aıttyq. Onyń aıtýynsha, atalǵan nysandy bir teńgege memleketke satpaq. Biz óz kezegimizde olaı bolmaıtynyn, ıaǵnı birinshi kezekte kásiporyndy ıelikke alǵan kezde onyń jaǵdaıy men qazirgi ahýalyn salystyryp, sonyń aıyrmashylyǵyn anyqtap alýdy talap ettik. Osy oraıda kásipker bul aıyrmashylyqty tóleýi tıis, sondaı-aq Ekibastuzdyń turǵyndaryna kelgen shyǵyndy ótep berýi kerek», - dedi E. Saırov.

Onyń aıtýynsha, elimizdegi olıgarhtar jylý elektr ortalyǵyn qaıtarý kezinde barlyq shyǵyndy óteýi tıis. Sebebi bul jelilerdiń kóbi jeke menshikte.

«Sondyqtan olıgarh toptar turǵyndardyń taǵdyryna jaýapkershilikpen qaraýy kerek», - dedi depýtat.

27 qarashada Ekibastuz jylý elektr ortalyǵynda apat bolyp, qala turǵyndary jylýsyz qalǵan edi.

Osydan keıin qaladaǵy balalardy qoldaý ortalyǵynyń tárbıelenýshileri Pavlodarǵa aýystyrylyp, mektep oqýshylary onlaın bilim alýǵa kóshirildi.

Premer-Mınıstr Álıhan Smaıylov Ekibastuz qalasyndaǵy jaǵdaıdy qalpyna keltirý boıynsha birqatar tapsyrma berdi.