Olıgarhtar ádil básekeniń jolyn kesip, kóleńkeli ekonomıka qymbatshylyqqa ákeldi – Rasýl Jumaly

NUR-SULTAN. QazAqparat – Búgin Májilistiń jalpy otyrysynda Memleket basshysy Úkimet aldyndaǵy basty mindetterdi kórsetip berdi. Jańa taǵaıyndalǵan Úkimet basshysy men onyń múshelerin qandaı ister kútip tur? Osy jáne ózge de saıası jaıttar jaıynda qazaqstandyq saıasattanýshy Rasýl Jumaly pikir bildirdi, dep habarlaıdy QazAqparat tilshisi.

«Búgingi kúnniń basty jańalyǵy - Memleket basshysy aldaǵy basty mindetterdi jiktep berdi jáne Úkimet basshysy taǵaıyndaldy. Endi Úkimettiń jańa quramy jasaqtalady. Búgingi jıynnan uqqanym, Qazaqstanǵa jańarý kerek. Jurttyń da kútip otyrǵany sol. Prezıdent barlyq sala boıynsha artyq-kem tusyn aıtyp, túıtkildi máselelerdi sheshýdi tapsyryp otyr. Jańa Úkimettiń Memleket basshysynyń tapsyrmasyn qalaı júzege asyratynyn ýaqyt kórsetedi. Qasym-Jomart Toqaev ashyǵyn aıtty, olıgarhııalyq toptyń paıda bolýy ádil básekelestiktiń jolyn kesip otyr, kóleńkeli ekonomıka qymbatshylyqqa ákeldi. Oǵan dálel - Aqtaý halqynyń suıytylǵan gaz baǵasyna qatysty talaby. Nátıjesinde baǵanyń negizsiz, qoldan jasalǵany belgili boldy. Beıbit talaptyń arty jappaı tártipsizdikke alyp keldi», - dedi Rasýl Jumaly.

Onyń aıtýynsha, eldegi jaǵdaıdyń ýshyǵýyna sybaılas jemqorlyq pen monopolııa zańdarynyń saqtalmaýy da sebep.

«Búgin aıtylǵan eldegi máseleler buǵan deıin de qozǵalyp júr. Biraq, sony sheshýshilerdiń kúsh-jigeri bolmaǵan sekildi. Endi Prezıdent iske qol túre kirisip, jigerli bolýdy ózinen bastap otyr. Memleket basshysynyń sózden iske kóshý kerektigin basa aıtqany kóńilge úmit uıalatady. Sondaı-aq, Qasym-Jomart Toqaev biraz jaıt pen keıbir quzyrly organdardyń qyzmetin synady. Rasynda, bylaı alyp qarasaq, beıbit sherýdiń arty jappaı tártipsizdikke aınaldy. Lańkestik árekettiń bolǵanyn Prezıdenttiń ózi aıtty, sonda lańkestik áreketke jol berip, ulttyq qaýipsizdik komıteti, basqa da quzyrly organdar qaıda qarap otyrdy? Tártip saqshylary sodyrlarmen kúresti, olar qaıdan keldi? Shekara qyzmeti qaıda qarap otyr? Suraq kóp. Endigi maqsat – osydan sabaq alyp, onyń qaıta bolýyna jol bermeý», - deıdi ol.