Óli teńizdiń sýyndaı kóli bar Besqaraǵaıda shıpajaı salyna bastady
ASTANA. QazAqparat - Shyǵys Qazaqstan oblysynyń Besqaraǵaı aýdanynda quny 250 mıllıon teńgeni quraıtyn shıpajaı kesheni salynbaq, dep habarlaıdy QazAqparat altaynews.kz saıtyna silteme jasap.
Sheteldikterdiń qyzyǵýshylyǵyn oıatqan bul nysan Shoshqaly kóliniń jaǵasynda boı kótermek.
Aýdan ákiminiń mindetin atqarýshy Erbolat Rahmetýllınniń aıtýynsha, týrıstik salany damytý sheńberinde aýdan kóleminde iri ınvestıtsııalyq jobalar iske asyrylýda.
«Shoshqaly kóliniń sýy quramy jaǵynan Izraıldegi Óli teńizdiń sýymen teń ekenin aıta ketken oryndy. Jalpy, bizdiń aýdanda emdik-saýyqtyrý týrızminiń damýyna basa nazar aýdarylýda. Búginde Besqaraǵaıda quny 250 mıllıon teńgeni quraıtyn «Eki dos» shıpajaı kesheni salynýda. Qazir bul nysandaǵy qurylys jumystarynyń 80 paıyzǵa jýyq bóligi aıaqtaldy. Atalmysh shıpajaıda maral qanymen emdeý kesheni, kıiz úı qalashyǵy, 300 oryndyq meıramhana, 120 oryndyq qonaqúı boı kóteredi dep josparlanýda», - deıdi Erbolat Rahmetýllın.
