Óli kúıinde tabylǵan jeti jasar balanyń anasy Saparbaevtan kómek surady
ASTANA. QazAqparat - Bes aı buryn denesi óli kúıinde tabylǵan jeti jasar Saıan Jaqsylyqtyń anasy Aqtóbe oblysynyń ákimine polıtseılerdiń áreketsizdigine shaǵymdandy.
«Men bes aı boıy kúttim, qylmystyq is boıynsha eshqandaı nátıjeler joq. Qazir ekinshi balamnyń ómiri úshin qaýiptenemin. Sizden kómek suraımyn, istiń tezirek ashylǵanyn qalaımyn», - dedi Berdibek Saparbaevqa Mııaly aýylynyń turǵyny Gúlmıra Seıitova.
Máıitke júrgizilgen saraptama nátıjesi ul bala býyndyrylyp óltirilgenin kórsetti. Patologoanatomdar balanyń denesinen basqa zaqymdar tappady. Jergilikti polıtsııa bólimshesiniń bastyǵy tergeý jumystary sot-genomdyq saraptamalardyń saldarynan toqtap turǵanyn aıtty.
«Saraptama nátıjelerin ózimiz de kútip otyrmyz. Onda óz merzimderi bar, bes aı tosý qajet, tekserý Astana men Atyraýda ǵana ótkiziledi», - dedi Áıteke bı aýdany Іshki ister bóliminiń bastyǵy Ardaq Ysmaıylov.
Óz kezeginde Aqtóbe oblysynyń ákimi qylmystyq istiń tergelýin óziniń jeke baqylaýyna alýǵa ýáde etti. «Qylmystyq isti aıaqtaý úshin saraptama qorytyndylary qajet. Jaǵdaıdy óz baqylaýymyzǵa alamyz», - dep qadap aıtty Berdibek Saparbaev.
Eske salsaq, jeti jasar Saıan Jaqsylyq 27 sáýir kúni mektepke ketip, iz-túzsiz joǵaldy. Balany bútin aýyl turǵyndary izdedi. Oqýshynyń polıetılen plenkasyna oralǵan denesi kelesi kúni tańerteń, týysqandardyń biriniń mal qorasynan tabyldy. Biraq bir kún buryn ol jerde eshteńe bolmaǵan. Polıtseıler deneni ol jerge ákelip tastaǵan degen tujyrymǵa keldi.
Aqparat «31» arnadan alyndy.
