Ólgen kıikterdiń sany 127 myńnan asty - A. Mamytbekov

ASTANA. QazAqparat - Qazaqstanda qyrylǵan kıikterdiń sany 127 myńnan asty. Bul týraly búgin OKQ baspasóz máslıhatynda QR Aýyl sharýashylyǵy mınıstri Asyljan Mamytbekov aıtty.

«Oryn alǵan oqıǵanyń túrli sebepteri qarastyrylyp jatyr. Sonyń ishinde topyraqtan, sýdan, shópten ýlaný qaýpi de bar. Endi biz kıikterdiń barlyq júrip ótken jerlerin tekseremiz. Olardyń óris joldary boıynsha arnaıy ekspedıtsııa jasaqtap, jiberýdi josparlap otyrmyz. Qazirgi kezde kóptegen kıikterde arnaıy "chıpter" bar, sondyqtan olardyń júrip ótken jolyn tabý ońaı», - dedi A.Mamytbekov.

QR AShM málimetteri boıynsha búgingi kúnde jappaı qyrylǵan kıikterdiń sany 127 myńǵa jetti. Budan buryn habarlaǵanymyzdaı, resmı derek boıynsha olardyń sany 112 475 bolǵan.