Ólgen egizderdiń anasy ata-analyq quqyǵynan aıyrmaýdy ótindi
ALMATY. QazAqparat - Aıýandyqpen óltirilgen egizderdiń anasy Alla Volchenko sotta úlken ulyna qatysty ata-analyq quqyǵynan aıyrmaýdy ótindi, dep habarlaıdy QazAqparat tilshisi.
Sot aldynda ólgen balalardyń ata-anasy - 29 jastaǵy Ózbekstan azamaty Emıl Gılmýtdınov pen 34 jastaǵy Alla Volchenko jaýap berip jatyr. Olarǵa qatysty QR QK 99-babynyń 2-bólimi 1,3,7 (kisi óltirý) tarmaqtary jáne 119-baptyń 1 bólimi (qaraýsyz qaldyrý) boıynsha is qozǵalǵan.
Sotta A.Volchenko 2 jastaǵy balasy anasynan qoryqpaıtynyn dáleldeıtinin psıhologııalyq saraptama jasaýyn ótindi.
«Men balalarymdy jaqsy kóretinmin. Mende burynǵy sýretter bar. Onda balalarymyz qaryny toq, ýaıymy joq», - dedi sottalýshy.
Sýdıa bul ótinishti qanaǵattandyrmady. Sebebi, bul ótinish iske qatysty emes dep tapty.
Buǵan deıin Volchenkonyń qorǵaýshysy sottalýshynyń jazasyn jeńildetýge baryn salatynyn aıtqan bolatyn. Osyndaı qylmys jasaǵany úshin Alla Volchenkoǵa 15 jyl kesilýi, al Emıl Gılmýtdınov 18 jyldan astam ýaqytqa bas bostandyǵynan aıyrylýy múmkin.
Tergeýshi suraq-jaýap barysynda Volchenkonyń kúıeýiniń jospary týraly bilgenin aıtqan edi.
Eske sala ketsek, 11 qyrkúıek kúni jantúrshigerlik oqıǵa Túriksib aýdanynda bolǵan. Kóppáterli úılerdiń birinde tońazytqyshtyń ishinen sábılerdiń múrdesi tabylǵan . Sol kúni Medeý aýdanynda adasyp júrgen eki jastaǵy er bala polıtsııaǵa jetkizildi. Bala ólgen egizderdiń aǵasy ekeni anyqtaldy. Egizderdiń ólimine kúdikti retinde olardyń ata-anasy ustaldy. Qazirgi ýaqytta sot aldynda Qazaqstan azamatshasy Alla Volchenkomen onyń azamattyq nekedegi kúıeýi Ózbekstan azamaty Emıl Gılmýtdınov jaýap berýde. Olarǵa qatysty QR QK 99-babynyń 2-bólimi 1,3,7 (kisi óltirý) tarmaqtary jáne 119-baptyń 1 bólimi (qaraýsyz qaldyrý) boıynsha is qozǵalǵan.
