Ólgen adamnyń dene múshelerin donor retinde paıdalanýdy Qazaqstanda da júzege asyrý qajet - Respýblıkalyq jedel medıtsınalyq járdem ortalyǵynyń ókili
ASTANA. 27 jeltoqsan. QazAqparat /Aıdar Ospanalıev/ - «Ólgen adamnyń dene múshelerin donor retinde paıdalanýdy Qazaqstanda da júzege asyrý qajet»,
deıdi «Respýblıkalyq jedel medıtsınalyq járdem ortalyǵy» aktsıonerlik qoǵamynyń transplantologııa jónindegi keńesshisi Ǵanı Quttymuratov. Bul týraly ol búgin transplantologııa máselesine arnalǵan jýrnalıstermen bolǵan baspasóz máslıhatynda aıtty.
Qazaqstanda bıylǵy jyly búırekti aýystyrýmen baılanysty 13 operatsııa jasalǵan. «Olardyń barlyǵyna da tiri adamdar donor boldy. Sonymen qatar bizde alǵash ret baýyrdy transplantatsııalaý sharasy júzege asyryldy. Ol da tiri donordan alyndy. Al ólgen adamdy donor retinde paıdalaný jaǵdaıy bizde osy ýaqytqa deıin bolǵan emes. Bul másele qazir qazaqstandyq medıtsına úshin úshin úlken problemaǵa aınalyp otyr. Bizde ólgen adamnyń dene múshelerin paıdalaný zańǵa qaıshy emes. Sondyqtan bul sharany júzege asyrýǵa qajetti jaǵdaılardyń barlyǵy jasaldy.
Transplantatsııany júzege asyratyn shet memleketterden bilim alyp kelgen bilikti mamandar da bar. Osy sebepti bizge búgin máıitti donor retinde paıdalanýdy jolǵa qoıý qajet»,-dedi Ǵ.Quttymuratov.
Sondaı-aq ol sózinde osy máseleni buqaralyq aqparat quraldary arqyly qalyń kópshilikke jetkizsek degen nıetteri bar ekendigin de jasyrmady. «Ólgen adamdy máıit retinde paıdalanýdy qazir qalyń kópshilik arasynda keńinen nasıhattaǵan durys. Óıtkeni buǵan jurtshylyq arasynda úrke qaraıtyndar jeterlik. Al shyn máninde bul adamgershilik jaǵynan alǵanda mán-mańyzy zor ıgilikti is»,-deıdi aktsıonerlik qoǵamnyń keńesshisi.
