Ólgen adamdarǵa tegin dári-dármek jazyp bergen - Mınıstrlik aqparatty joqqa shyǵardy

ASTANA. QazAqparat - Áleýmettik jelilerde Oljas Ábishevtiń (2017-2020 jyldary densaýlyq saqtaý vıtse-mınıstri bolǵan - red.) «qaıtys bolǵan adamdarǵa retsept boıynsha tegin dári-dármek beriledi» dep aıtqan suhbaty tarady. QR Densaýlyq saqtaý mınıstrligi osy málimdemege túsinik berdi, dep habarlaıdy QazAqparat stopfake.kz resýrsyna silteme jasap.

«Densaýlyq saqtaý mınıstrligi bul aqparat shyndyqqa janaspaıtynyn málimdeıdi. Búgingi kúni TMKKK jáne MÁMS sheńberinde halyqty dárilik zattarmen tıimdi jáne ashyq qamtamasyz etý maqsatynda medıtsınalyq jáne farmatsevtıkalyq baqylaý komıtetiniń atynan DQAJ-ǵa jáne medıtsınalyq aqparattyq júıege turaqty monıtorıng jasalady. Budan basqa, preparattardy berý rásimi Áleýmettik jáne medıtsınalyq saqtandyrý qory men «SQ-Farmatsııa» JShS deńgeıinde baqylanady. Buryn qaıtys bolǵan patsıentterge retsept jazýdyń jekelegen jaǵdaılary bolǵan. Anyqtalǵan faktiler boıynsha egjeı-tegjeıli taldaý kezinde bul jaǵdaılar dári-dármekpen qamtamasyz etýdiń aqparattyq júıesine derekterdi ýaqtyly engizbeýdiń saldarynan bolǵany anyqtaldy» dep málimdedi mınıstrlik.

Vedomstvo málimetinshe, qazirgi ýaqytta dári-dármek alý týraly rastaý kody bar SMS habarlama kómegimen patsıentten rastaý alý boıynsha servısti jetildirý jumysy júrip jatyr.

Densaýlyq saqtaý mınıstrligi basqa memlekettik organdarmen birlesip dárilik zattardy tsıfrlyq tańbalaý men qadaǵalaýdy engizetin jobany iske asyryp jatyr.

Bul jobanyń nátıjesi dári-dármekpen qamtamasyz etýdi tolyq tsıfrlandyrýy kerek, bul búkil ómirlik tsıkl jolynda dári-dármek qozǵalysynyń ashyqtyǵyna ákeledi jáne dári-dármektiń sapasyn baqylaýǵa kómektesedi.

«QR Qylmystyq kodeksiniń 274-babyna sáıkes kórineý jalǵan aqparat taratqany úshin aıyppul, túzeý jumystary, shekteý nemese bas bostandyǵynan aıyrý túrindegi jaza qoldanylýy múmkin ekenin esterińizge sala keteıik. Kórineý jalǵan aqparat taratýdyń osy faktisi boıynsha Densaýlyq saqtaý mınıstrligi quqyq qorǵaý organdaryna júginýge quqyǵy bar», – delingen vedomstvo habarlamasynda.