Olga Shmeleva men Tatıana Tokarnıtskaıa Azııa oıyndarynyń kúmis júldegeri atandy

Qazaqstandyq sportshylar baıdarka men kanoede esý jarysynda áıelder arasyndaǵy 500 metrlik qashyqtyqta baıdarka-ekilik saıysynda óner kórsetti. Fınaldyq básekede Shmeleva men Tokarnıtskaıa ekinshi nátıje kórsetip, Qazaqstan quramasynyń qorjynyna taǵy bir kúmis medal saldy.

Sońǵy jyldary Qazaqstanda esý sportyn damytýǵa, sonyń ishinde zamanaýı sport ınfraqurylymyn nyǵaıtýǵa erekshe kóńil bólinip keledi. Osy baǵyttaǵy mańyzdy jobalardyń biri – Memleket basshysynyń tapsyrmasy boıynsha Túrkistanda salynǵan halyqaralyq deńgeıdegi eskek esý kanaly. 2025 jyly paıdalanýǵa berilgen keshenniń aýmaǵy shamamen 100 gektardy, uzyndyǵy 2,2 shaqyrymnan asady. Zamanaýı nysan sportshylardyń tolyqqandy jattyǵýyna, oqý-jattyǵý jıyndaryn el aýmaǵynda ótkizýge jáne esý sportynan iri halyqaralyq jarystar uıymdastyrýǵa múmkindik beredi.

Jańa sport ınfraqurylymy ulttyq quramanyń sapaly daıyndyǵyna jaǵdaı jasap, Qazaqstanda esý sportyn odan ári damytýǵa qosymsha serpin berip otyr.

Olga Shmeleva men Tatıana Tokarnıtskaıanyń kúmis júldesi Qazaqstan quramasynyń XX jazǵy Azııa oıyndaryndaǵy kezekti medali boldy.

Aıta ketelik Qazaqstan quramasy Japonııanyń Aıchı prefektýrasy jáne Nagoıa qalasynda ótip jatqan HH jazǵy Azııa oıyndarynda segizinshi altyn júldeni qorjynǵa salǵan edi.