Olga Rypakova Qazaqstan jeńil atletıka federatsııasynyń prezıdenti qyzmetinen ketti

ASTANA. KAZINFORM – Qazaqstan jeńil atletıka federatsııasynda kadrlyq aýys-túıister boldy, dep habarlaıdy uıymnyń baspasóz qyzmeti.

London Olımpıadasynyń chempıony, elimizdiń dańqty sportshysy Olga Rypakova Qazaqstan jeńil atletıka federatsııasynyń qurmetti prezıdenti bolyp saılandy.

Ol Halyqaralyq jeńil atletıka federatsııasynyń múshesi retinde halyqaralyq uıymdarmen baılanys ornatý, sheteldik mamandarmen áriptestik aıasynda tyǵyz jumys isteý sııaqty mazmundy ári mańyzdy qyzmettiń kóptigine baılanysty Qazaqstan jeńil atletıka federatsııasynyń prezıdenti laýazymynan Qurmetti prezıdent laýazymyna aýysty.

Olga Rypakova buǵan deıin bir jyl boıy federatsııa prezıdenti qyzmetin atqarǵan bolatyn.

Al Qazaqstan jeńil atletıka federatsııasynyń prezıdenti qyzmetine «QazMunaıGaz» ulttyq kompanııasy» AQ Basqarma tóraǵasy Ashat Hasenov taǵaıyndaldy.

Aıta keteıik, jeńil atletıka – elimizdegi eń tanymal sport túrleriniń biri. Qazirgi tańda Qazaqstanda bul sport túrimen 360 myńnan astam adam júıeli túrde aınalysady. 

Eske sala keteıik, buǵan deıin «Oqjetpes» fýtbol klýbyna jańa bapker taǵaıyndalǵanyn jazǵanbyz.