Olga Rypakova HOK prezıdenti Tomas Bahpen kezdesti
ASTANA.KAZINFORM - Azııa Olımpıadalyq Keńesi (AOK) Atqarýshy komıtetiniń múshesi, Qazaqstan Ulttyq Olımpıadalyq komıteti sportshylar komıssııasynyń tóraıymy Olga Rypakova Harbınde ótip jatqan Qysqy Azııa oıyndarynda Halyqaralyq Olımpıadalyq komıtetiniń (HOK) prezıdenti Tomas Bahpen kezdesti.

Ulttyq olımpıadalyq komıtettiń málimetinshe, kezdesý barysynda Tomas Bah Olga Rypakovanyń jetistikterin atap ótip, onyń olımpıadalyq qundylyqtardy damytý men qoldaýǵa qosqan úlesin joǵary baǵalady. Sondaı-aq ol Qazaqstannyń iri halyqaralyq sporttyq jarystardy, sonyń ishinde jeńil atletıka boıynsha jarystardy ótkizýge joǵary áleýeti bar ekenin aıtty.
Óz kezeginde Olga Rypakova bul kezdesýdiń mańyzdylyǵyn atap ótip, alǵysyn bildirdi.
– Eń aldymen, olımpıada chempıony retinde Tomas Bahpen jeke kezdesý men pikir almasý – men úshin úlken qurmet. Biz tek qazaqstandyq sporttyń ǵana emes, jalpy olımpıadalyq qozǵalystyń damýy týraly áńgimelestik. Bolashaqta halyqaralyq yntymaqtastyqty odan ári nyǵaıtatynymyzǵa senimdimin, – dedi olımpıada chempıony Olga Rypakova.
Eske sala keteıik, Olga Rypakova sporttyq mansabynda úsh ret Olımpıada oıyndarynyń júldegeri atanǵan. Ol 2012 jyly Londonda altyn, 2008 jyly Beıjińde kúmis, al 2016 jyly Rıo-de-Janeıroda qola medal jeńip aldy.
2024 jyldyń qyrkúıeginde Azııa Olımpıadalyq Keńesi Atqarýshy komıtetiniń múshesi bolyp saılandy. Sonymen qatar ol Qazaqstan jeńil atletıka federatsııasynyń prezıdenti.
Aıta keteıik, Qytaıdyń Harbın qalasynda ótip jatqan IX qysqy Azııa oıyndarynyń alǵashqy jarys kúni óz máresine jetti.
Qazaqstan quramasy medaldar kestesinde tórtinshi orynda.